Home / archiefcentraal / denne van knoldert handhaving

denne van knoldert handhaving

Ik kreeg lest een brieve in de busse det mien vergunning vöar buten een vuurtie te stokken verlopen was. As ik verlenging wolle, kon ik een neejen aanvroang. Ik ben zo begoane met de gemeente die als mar minder van ons geld mut uutgee’m, det ik mee helpe denken. En hier hebbe wie wat bie kop.

D’r is d’r bliekbaar an de gemeente ientie bezig met controlearen of een vergunning vöar ontheffing van het verbod op vuurties te stokken verlopen is. Zollen ze andere vergunningen ok op hun verloopdatum controlearen. Of ie ontheffing hebt vöar het verbod op oe hond ongelijnd uutloaten. En of ie ontheffing hebt vöar het verbod op reclamebörden vöar oe winkel te zetten.

‘Verborgen werkloosheid’ heetten det vrogger in communistische landen. Direct met stoppen. Schelt zo een paar salarissen.

Op de controle, mar ok op de vergunning kan nog flink bezundigd wönn. Ie kriegt vöar vief joar recht tut snoeiholt in de fik stekken, ie mut det iedere kear det ie det doet een dag vöarof melden en dan is het goed. De anvroag wördt niet controleard, de brand zelf ok niet. Ik heb d’r de ofgelopen vief joar tenminsten nooit iene van de gemeente vöar an huus ehad. As iederiene de vergunning krig, wat is dan eigenlijk het probleem met die vuurties?

Ie kriegt toestemming via het ‘aanvraagformulier ontheffing van het verbod voor verbranden van afvalstoffen buiten inrichtingen of anderszins vuur stoken’. As ie det gin rare zinne vindt, dan werk ie an de gemeente.

De gemeente verbiedt dus iets en gif doarnoa iederiene die det wul ontheffing, a 90 euro per ontheffing. Communisten nuumt det verplichte winkelnering. Hier werk ie dan bie ‘team vergunningen en handhaving’.

Hoe controleart ze? Op werkdaang, as ambtenaren werkt. Mar dan stekke wie gin vuurtie. En in het weekend, met een vliegtuugie. Dan kan milieuoaverlast het bezwoar van vuurtie stokken niet weane. Want íen kear een vuurtie, of iedere zundag zo’n rust verstorend vliegtuugie in de lucht… Golden tip die ik kreeg: vuurtie stokken met slecht wear. Dan bent de ambtenaren binnen en het vliegtuugie an de grond.

Mar ik denk det ik een makkelijker oplossing hebbe: vuurtie stokken niet verbieden. Want det is nergens vöar neudig. Behalve dan öm de verborgen werkloosheid teeng te goane.

Denne van Knöldert.

Lees ook

Carolien Jonkman: Luisteren

Steeds meer mensen luisteren naar zichzelf en zijn zich bewust van wat er in hun …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.