“U spreekt met de gemeente Olst-Wijhe en haar partners”, zei het antwoardapparaat van, ik dach de gemeente Olst-Wieje, mar ik had dus ok de partners ebeld. Partners?
“We proberen u zo spoedig mogelijk te helpen”, zei het antwoardapparaat. Det is denk ik de meest gebruukte leugen van Nederland. D’r kump heus gin tillefoniste earder terugge van koffiepauze as het eam heel druk is. As vrogger iemand niet te bereiken was, wönn d’r niet op’enömm. Noe kom ie in de wacht (en tikt de teller gelieke met), wat klantvriendelijker zol weane. Ik betwiefel det.
…en partners… Wie zollen det weane? De brandwear? De gemeente Deamter, woar de meeste ambtenaren inmiddels werkt? Projectontwikkelaars? De vrouw van de burgemeester! Eam vroang as ze mie straks zo gauw mogelijk goat helpen.
Ja, doar had ie ‘m al: “Met het klant contact centre van de gemeente Olst-Wijhe, waarmee kan ik u van dienst zijn?”
Pardon? Ik was op slag mien bedoelde vroage vergetten. Partners, wat kon het mie schellen. Ik wol earst iets weten oaver det klant contact centre.
“Nou, we nemen hier de telefoon centraal aan en verbinden de klant dan door.”
“Ja, det doet ze oaveral.”
“En omdat we hier met meerderen in het pand zitten…”
Ik zag de vergadering vöar mie woarin ze det besleuten. Ien onbenul (mar wel de baas), zes joa-knikkers (woarvan d’r twee het etten van vanoamd in gedachten hadden en iene zien email op een Ipad controlearen) en iene die teeng was. De baas kreeg de joa-knikkers mee, oaver een half joar is d’r een evaluatie en dan krig de teengstemmer geliek. Mar niet hillemoal. Zie goat nog wel ietsie an zien vöarstel anpassen.
“Wat ule mut doene, is op de stoel van de beller goan zitten en bedenken wat die logisch vindt”, leng ik uut. “Die belt de gemeente Olst-Wieje, dus pak dan an met de gemeente Olst-Wieje.
“Mar wie hebt ok partners hier in het gemeentehuus.”
Kiek, had ik ok mien andere vroage op toafel. “Ik mag toch hoppen det die ollemoal eigen nummers hebt? Dan kun ie toch ziene vöar wie ze belt.”
“Maar naar wie kan ik u doorverbinden?”
“Ik mut de gemeentesecretaris he’mm. Of de griffie. Of zo. Kunt die ok gin name krieng woar uut blik wat ze doet?”
Denne van Knöldert
Meer foto's