Home / archiefcentraal / denne van knoldert mien stem

denne van knoldert mien stem

Ik kan woensdag niet stemmen. En noe ben ik op zuuk noar iene die det vöar mie wul doene. Wie de meest originele reactie onder disse column op de site zet, krig mien stempas. En mag zelf weten wat e stemt.

Ik ben de ienige jury die bepaalt wat leuk is en wat niet. En ik heb ok wel een paar dinge woar ik specifiek op goa letten. Mar net as een besloten vergadering of een ambtenaar die zich verschuult achter regels die niemand snapt, gif ik de beoardeling niet van te vöaren an. Ik kan wel vertellen det het heel völle regels bent, en ok det het ollemoal onzinregels bent.

Ik maak de regels niet bekend, ömdet ik ze ok zo mar wear wulle kunnen veranderen. Net zo makkelijk! Ik zal de regels trouwens wel vaste leggen. Vöar een periode van twee joar. As d’r teeng die tied een of andere achterlijke accreditatiecommissie wul kieken of ik het wel volgens de geldende kwaliteitsnormen edoane hebbe, heb ik bewiesmateriaal.

Mar dan benne wie al wear twee joar verder. De earste roadsleden bent dan al wear teleurgesteld op estapt. Een wetholder is ok vaste al van het pluche etrapt. En het vertrouwen in de politiek is verder edaald töt onder de 10 procent. Ok een zekerheid is det al onze roadsleden zich oaver twee joar op gin enkele maniere nog loat verleiden hun belangrijke roadswerk in het openbaar uut te komm leng an vroagende burgers. Det giet pas oaver drie en half joar wear geböaren. Disse dinsdag en woensdag nog eam, en dan goat de dames en heren politici uutrusten tut an de volgende verkiezingen.

De leukste reactie onder dit bericht, ik lek toch wat informatie. Hij mut humor bevatten. Spitsvondig weane. Liefst een dubbele bodem hemm’. Goan oaver de gemeente (wukken, det maakt mie niet uut). Het zol mooi weane as de opmerking bezunigt, goed is vöar het milieu, werkgelegenheid opleavert, veiligheid garandeart, de zorg op een goed plan brengt en de kleine kernen leavensvatbaar hölt.

Liever niet te zuurproemig, te naargeestig, te rancuneus.

Ik ben benieuwd noar de reacties. Politici meu’ng ok meedoene. Die hoeft vöar disse iene kear niet te wachten tut in de roadszaal woar niemand höart wat ze doet.

Nou, ofwachten mar, de stempas lig kloar. Mien handtekening stiet d’r al onder.

Denne van Knöldert.

Lees ook

Wereldwinkel Heino in actie voor coronahulp in Nepal

HEINO – Wereldwinkel Heino heeft besloten om 10 procent van de maandomzet van augustus rechtstreeks …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.