Home / archiefcentraal / denne van knoldert dood

denne van knoldert dood

Ik wasse gisteren op het werk zo druk, det ik dache: ‘as ik d’r noe dood bie near zolle vallen, dan kump mien werk nooit of, mar dreijt de wereld gewoon döar. Of iene nemt mien werk oaver, of mear vermoedelijk: niemand merkt ooit det mien werk niet of is’.

Mien werk niet of. As ik dood zolle weane is doar niks mis met. Mar ömdet ik nog leave, deugt det niet. Gek eigenlijk.

Ik ben zo vervangbaar as mar kan. Misschien det iemand disse verhaalties mist, mar met een wekke of twee kent niemand Denne mear. En mien name zal zeldzaam herdacht wönn. In 2013 was d’r mar ien oalderpaar die hun kind noar mie vernuumd hef.

Toen mie de hond lest dood ging was de earste vroage op mien werk of ik nog een anderen wear nam. Det suggereart ok een soart van vervangbaarheid. Ik zegge: “Ie nemt toch ok gin neeje vrouw as die van oe dood giet?” Woarop mien collega zei: “Nou, det denk ik eigenlijk wel.” En een andere college: “Ik doe det ok wel zonder det mien vrouw dood is.”

Ja, ’t is heel gezellig op het werk.

In de trein hadden ze noast mie in de coupé ok zo’n soart gesprek.

“Mien va mut van de wekke opereard wönn an zien heup.”

“Hoe oald is die dan.”

“83.”

“Oh dan, op die leaftied… dan krieg ie det.”

“Mar hij deud nog van alles.” En völle mear zei ’t meanse de wiedere treinreis niet. Die was knap nösterig van die leste opmerking ‘e wönn. ‘Op die leaftied’, asof leaftied een groadmeter is. Ik geleuf wel det ik heur nog zagge denken ‘en ieje dan, oale wief, val toch dood’, mar det weet ik niet zeker.

Bie Google bent ze zo verre det ze mien herseninhold op een harde schijf kunt krieng, zodet mien geest noa mien dood wieders kan. Of det het rouwproces van noabestoanden bevordert? Ik vroage mie het of. ’t Is muuilijk inschatten hoe meansen doar met ömme goat.

Hoezear de dood van mens of dier oe angrip hef vöaral te maken met de aaibaarheidsfactor van de oaverlede, denk ik. De katte had lest een moes met noar binnen had e’nömm. De katte wol d’r ‘kat en moes’ met spöllen. Mar ik had toch liever det e die moes dood maken.

Denne van Knöldert

Lees ook

StöppelCabana moet een blijvertje worden

Zomercarnaval buiten bij Bij Lampe met beachvolleybaltoernooi, muziek en entertainment RAALTE – StöppelCabana, het nieuwe …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.