Ik ging lest met de trein van Roalte noar Enschede. In Wierden reupen ze ömme det de trein niet verder ging. Verder mossen wie het zelf mar uutzuken. Ik heb de earste trein trugge noar huus epakt, snel de auto egrepen en zo was ik mar anderhalf uur te late op mien ofspraak.
As ie teengwoardig met de trein reist heb ie een OV-chipkaarte. Det is een soart bankpassie woarmee ie mut inchecken. Langs een scanner halen op het station en dan blieb bie inloggen en blieb blieb bie uutloggen. Handig? Nee, want as d’r een trein vol mensen uutcheckt giet het van blieberdeblieb en heb ie gin idee hoevake det kaartie van oe e bliebt hef. As ie bie anvang inbliebt en an het eind wear uutbliebbliebt, giet det van zelf wel goed. Mar dan loop ie het perron op, kom ie net een kennis teeng en dan weet ie van de wearomstuit niet mear of ie wel inebliebt hebt.
Ik checken in in Roalte, pakken een half uur later vanuut Wierden de trein terugge en bliepbliepen een uur later in Roalte ok wear uut. An het eind van de moand zag ik det de NS mie doar twintig euro vöar in rekkening ebracht had.
Smearlappen. Zo kan ik ok wel an een bonus komm’.
Dus ik vreug geld terugge bie de OV-chipkaarte. “Wat spijtig”, kreeg ik als antwoard noadet ik inlogcodes en wachtwoarden bie mekare evunn hadde öm uberhaubt mien declaratie in te vullen, “mar ie mut bie oe OV-vervoerder weane.” Woarna het meanse vermoedelijk verder ging met haar nagels of te lakken.
Ik verzamelde moed, inlogname en wachtwoard vöar de NS-site. “Hebt u vragen? Stel ze Eva”, las ik op hun site. As of ik gek benne. Vraag het Eva… Det dut een mooie meid vermoeden met zwoele stemme, mar het is gewoon een mensvervangende computer die niet denkt, mar allenig vöargeprogrammearde vroang kan beantwoarden, net op zo’n maniere det ie d’r nog niks an hebt.
En disse Eva was ok nog ongesteld ok. Want zie wol het niet doene. Gin koppiene, mar ander malleur. Eva: “Hoe nu verder? Probeer het opnieuw!”
Alles met mekare ben ik twee uur bezig ewest öm geld terugge te krieng det de NS gewoon van mie egapt had. Twee uur, twintig euro. Ie zollen het d’r bienoa bie loaten zitten. Mar det gun ik Eva niet.
Denne van Knöldert
Meer foto's