Home / archiefcentraal / denne van knoldert u of ieje

denne van knoldert u of ieje

Disse wekke ging de discussie oaver ‘u’ of ‘je’. Oaver ‘ieje’ dus. Wat ie teeng wie mut zeng. Nou, ik heb doar niet zo’n last van. Of het mut weane det steeds mear meansen ‘u’ teeng mie goat zeng. Ik wörd oald, denk ik.

De discussie wönn op’ewakkerd döar twee huppelkutties van de Volkskrante. Twee snotneusies die d’r achter waren ekomm det ze teeng opa en oma liever ‘u’ zei’en en hun ömgeving det hillemoal niet deut. Reden genog vöar een scherp artikel in de krant vöar links Nederland.

D’r ontstund een hopeloze discussie in het land. Oaver respect hebben en respect krieng. En of ‘u’ doar met te maken had. Niet, natuurlijk. Respect giet oaver hoe ie met meansen ömmegoat, niet hoe ie ze nuumt. Mar vöar zukke referentiekaders waren die Volkskrantmeissies al te licht. Ik denk universitair geschoold mar vergetten wat rond te kieken in de wereld.

“En in België dan?” vreug een wieslippe zich of. Nou, toen hebt ze een Belgische deskundige ebeld. “Ja, hier zegt de wichter ‘u’ teeng de oalders.”

Zie noe mar?, dach de wiesbek. Mar de Belg was nog niet uut eproat. “En de oalders zegt ok ‘u’ teeng de wichter. Wie proat hier namelijk met ‘ge’, en doar past ‘u’ bie. Moeder zeg teeng haar kind bevobbeld ‘Denkt ge aan uw boterhammekes?’ as het kind noar schoele giet.”

Weg vergeliek.

In Engeland hebt ze d’r ok gin last van. Doar is iederiene ‘you’. En rekken mar det ze doar respect vöar mekare hebt. As een Bobby onder an de tribune een hooligan hoog in het stadion met mar íen vinger wenkt, kumt het rotjoch noar beneden.

In ’t plat giet het ok lössies. ‘Ieje’ stiet vöar ‘u’ en ‘je’.

“Denk ie d’r an stoete met te nemm’ noar oe werk?”

“Wat heb ie d’r vöar mie op’esmeard dan?”

De’s respect: stoete smearen vöar oe man.

Ik had bie RTV Oost een collega die een reportage had emaakt woarmee hij een landelijke fatsoenspries ewunn had. Hij interviewen wichter met het syndroom van Down, en hij sprak de vrolijke fluiters consequent an met ‘u’. “Geweldig det ie op die manier oe respect hebt loaten blieken vöar de Down-meansen”, zei de jury.

Ik sprakke d’r later iene. Hij zeg: “die verslaggever zei de hele tied ‘u’ teeng oons, hij denkt toch niet dette wie gek bent?”

Denne van Knöldert

Lees ook

Lezing in Holstohus over Zwitserse kunstenaarskolonie

OLST – Anjette van de Ven van Bureau KunstVenster verzorgt op maandag 25 oktober een …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.