Home / archiefcentraal / denne van knoldert kettel

denne van knoldert kettel

“Dut de vloerverwarming het wel?”, vreug mien vrouw. De monteur had net een grote böarte doane an de verwarmingskettel. Ik wus det ze zich ofvreug of het doar met te maken had. Mar öm te vöarkommen det ik die kettel mos inspectearen zei ik: “weet ik niet?”

‘Weet ik niet!’ is in deze een heel ander antwoard dan ‘Weet ik niet?’ Want met een uutroepteken geef ie het gesprek uut handen. Met een vroagteken mut de ander reageren.

Korte stilte. Ik vulen höar denken van ‘hoe noe wieder’.

Vief minuten later.

“En toch vroag ik mie of of de vloerverwarming het dut.”

“Hoe kun ie det an de weet ko’mm dan?”

Oonze opvoeding is d’r op gebaseerd de wichter oplossingsgericht de wereld in te schöppen. Die tactiek kwam mie noe wel van passe.

Vief minuten later.

“Zol het an de verwarmingskettel kunnen ling? De monteur is vanmiddag ewest…”

“Det zol toch niet?”

Ok al las ik d’r niet in, het leek mie een goed moment een bladzijde van mien boek ömme te sloane, net te doene of ik wear in gedachten verzunken was.

Vief minuten later.

Mien vrouw stund op en leup noar de biekeuken. Mooie momenten, as ie ziet det een tactiek precies giet zoas ie ‘m in wollen zetten.

Mar eam later kwam zie terugge met de mededeling: “Nee ik zie niks ongewoons.” Toen was mien opzet dus toch nog hillemoal in het honderd elopen. Zie had, zoas ik det wel ‘ns höare zeng, ‘mien karregie in de poep erene. En ‘m doar stevige vaste parkeard.

Want wat mos ik met die opmerking: “Ik zie niks ongewoons.” As d’r bie oons in huus noe ientie is die niks gin verstand van techniek hef… Dus ik sprung op uut de banke, vleug noar de biekeuken en… zag inderdaad ok niks ongewoons.

“Nee, det zei ik toch?” zeg mien vrouw? “Het is hier ok niet koald of zo. Mar ik leup op blote voeten en had het idee dat de vloere niet zo warm was. Ik denke det mien voeten warmer bent dan de vloere.”

Zonder ienig besef det ik doar in de banke zatte met het gevuul net een pöttie scrabble verlöaren te he’mm, pakken zie de droad wear op met: “köppie thee he’mm?”

Sindsdien loop ik iedere dag eam langs de verwarmingskettel öm te kieken of e nog dut.

Denne van Knöldert

Lees ook

Werkzaamheden N340: Kwekerij Onderdijk stelt uit frustratie groene ontheffingskaart beschikbaar

DALFSEN – Kwekerij Onderdijk in Dalfsen heeft in verband met de komende werkzaamheden aan de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.