De ANBW is een intens nare club. Ie kunt makkelijk lid wö’nn mar oe lidmoatschap opzeng giet heel mulijk. An de tillefoon krieg ie ze niet. Adressen geeft ze niet. En het ergste: zie zegt det ze een mening hebt namens mie.
Zo kort vöar de Kerst herschik ik altied alles wat ik heb an verzekeringen en anverwante artikelen hebbe lopen. Bie de smearzakken van de ANWB ben ie dan al te late: half november is de leste dag det ie vöar het neeje joar uut kunt stappen.
Mar as ie dan oe lidmoatschap wult opzeng kan det – in teengstelling töt van alles en nog wat wat ie extra an service wult he’mm, niet via de site. Det doet die geldwolven natuurlijk expres. Een brief sturen kan ok niet: want wat is het adres? Op de site stiet det niet. Doarbie: het mut tillefonisch.
As ie ze belt mut ie earst een keuzemenu döar zonder de optie van ‘opzeggen’ en dan krieg ie te höaren det het heel druk is en det ie dus lange mut wachten. Liegbeesten bent het ok. Het is namelijk niet heel druk, zie hebt de weinig personeel in ehuurd. Expres. Lange wachten is namelijk niet erg: want bellers wult opzeng, anderen kunt via de site terechte.
Wrum zit de ANWB zo in mekare? Ik denk öm de algehele löagloop te vertragen. Wegenwachten hebbe wie namelijk niet mear neudig, doar bent de auto’s te goed vöar. En die kear det ik ze neudig hadde was op Schiphol woar mie de accu löag was eraakt noa een vliegvakantie. D’r stunn’ wel vieftien ANWB-waangs op een Schipholse verzamelplaatse te wachten op een oproep, mar toen ik een chauffeur öm startkabelhulp vreuge mos ik mar gewoon de wegenwacht bellen!
Klantvriendelijk bet ze ok niet.
Mar het meeste wat mie de an de ANWB dwars zit, is det ze een belangenbehartiger bent en de regering doar noar lustert. Wiens belangen behartiget de ANWB dan? Niet die van mie. Want ik höare ze nooit vöar minden weang, kilometerheffing, uutbreiding van het treinnet en fietssnelwegen pleiten.
En noe ze ok al gin winkels mear in de buurte hebt met vakantiegerelateard spul, noe is d’r gin enkele reden mear öm lid te weane, allenig mar redenen öm op te zeng. Det lukt pas noa een kwartier in de wacht en dan nog pas per 2015.
Rotzakken.
Denne van Knöldert
Meer foto's