Home / archiefcentraal / denne van knoldert zwerver

denne van knoldert zwerver

Ik had de portemonnee vergetten dus mos ik in Deamter mien auto buten de betaald parkeren-zone kwiet zien te raken. En vermoedelijk hef det een zwerver het leam ered. Want met det ik een stroate indreijen zag ik de man op de stoepe ling.

Zal wel dronken weane, dach ik vanachter het stuur, dus dreijen ik earst de auto vakkundig achterhears een vrieje plekke langs de weg in. Mar toen ik vöarbie de zwerver leup zag ik zien oong half open stoane, zien gezicht poars weane en wieders zien lichaam roerloos. Gin teken van leam.

Een vrouw leut haar hundtie uut en het keffertie sleut gelieke an. Mar de zwerver bleef roerloos. “Dood?” vreug de vrouw?

Ik heb 112 d’r bie e beld.

Ik zeg “d’r lig hier een man die net zo goed dood as leamd kan weane.”

“Wat mutte wie sturen?” vroegen ze an de andere kante. “Politie of ambulance?”

Ik zeg: “As het ule niet uutmaak, doe dan beiden mar.”

“Wul ie ondertussen reanimatie toepassen?”

Mar doar ben ik niet van. Ik kan det niet. En ik zol det ok zo nog mar niet durven op zo’n zwerver an de kaante van de weg. “As ule noe earst die ambulance stuurt…” probearen ik mie d’r uut te lullen. Mar die was al lange onderweg, zei de mevrouw. Ik höaren inderdaad al zwaailichten. Eam later was d’r politie met motor, iene in een auto, en dreien d’r twee ambulances de parkearvrieje stroate in.

Het leek mie een goed moment noar de vergadering te goane die ik had.

Thuus vertellen ien van de wichter oaver een college in ethiek. Det ze een tram besturen die op hol was e sloane. Remmen kon niet mear. Sturen nog wel. En rechtsof stund vier man op het spoar. Linksof iene. Welke keus ze zol maken. Det werd links. Mar toen bleek det iene mens een kind en det kluppie van viere waren heel oale luu. Ja, wat doe ie dan?

Ik dach terugge an de zwerver. Noa de vergadering had ik nog eam bie het kefhundtie an ebeld. Zie hadden de borstkas van de man wear in ritme ekreeng en toen was e de ambulance in egoane. Mos ik learen reanimearen? Of mos die zwerver learen van de drank of te bliem?

En as ik tramchauffeur was, woar zol ik dan noar toe sturen? Wat zol ie doene?

Denne van Knöldert

Lees ook

Voorwaarden Rood voor Rood kavels Marissink online

RAALTE – De gemeente Raalte start na de zomer met de uitgifte van Rood voor …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.