Home / archiefcentraal / denne van knoldert wasmachine

denne van knoldert wasmachine

Soms snap ik niet hoe hard de wereld verandert. De techniek giet zo snel det ik vandage denke te snappen woar een eigen internetsite vöar in ezet kan wönn en det ze dan mo’nn Facebook en Twitter bedacht hebt. Een eigen site? Foei wat olderwets.

Trijntje Oosterhuus krig det ok ollemoal niet met. Die wol een euro noar de Filipijnen sturen per kear det iemand anklikken det die haar bericht zo leuk vund. Nou, det was zo 200.000 kear gebeurd. Ie mut mear van wiskunde snappen dan van Facebook öm te weten hoe det giet, mar het giet!

Een Maastrichtse evenementenhal beud Trijntje gratis onderdak öm in plaatsen van al det geld een benefitoptreden te gee’m. Slimme jongens, die weet dan wel wear hoe det werkt, want zie kriegt d’r gratis reclame mee, of Trijntje noe wel of niet kump.

Trijntje kump trouwens niet en lött doarmet een schitterende promotiestunt liggen. Net as de Deamter schouwburg, woar Trijtje in 2011 wél een benefit gaf. As ie doar via Google op klikt kom ie op de site van de schouwburg, mar dan mut ie oe earst inloggen. Een gemiste kans.

De jongens van Siemens, die hebt pas begrepen hoe het teengswoardig mut. Die hebt onderzöcht det mannen van 40 joar en older de wasse oaverloat an hun vrouw of zelfs an hun moeder. En zie onderzöchen ok det een groot deel van die mannen de wasse zollen goan doene as ze d’r een mooie vrouw vöar in huus kreeng. Tja, dan mut ie ok wel, want det leavert an de lopende band smearige lakens op. Willem Alexander, zo dachen de meeste vroagbeantwoarders, hef nog nooit een wasmachine an eraakt. En Mart Smeets wast zien eigen wollen truien niet.

Het onderzuuk ging snel via Social Media in de rondte. Het had – weet Trijntje inmiddels ok – zo mar 200.000 likes. Mar bie Siemens zal ze det onderzuuk een rotzörge weane. Misschien was d’r wel nooit gin onderzuuk ehoalen. Zie wollen allenig mar andacht vöar hun neeje wasmachine. Ientie met sensoren die d’r vöar zörgt det d’r nooit mear iets fout giet met wassen.

Die jongens van Siemens weet precies wat ze mut met Social Media. Mar ja, dan heb ik nog steeds een vrouw neudig die de wasse d’r in dut, d’r uut haalt, ophangt, strik en opvouwt.

Denne van Knöldert.

Lees ook

Hans de Kort: Windturbines

(ingezonden brief) Hans de Kort is weer in de pen geklommen om zijn ongenoegen over …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.