Mien ervaring is anders, twee kanten op. Bromfietsers weet niet det het rechthoekige börd bromfietsers uutslöt. En bienoa alle andere weggebrukers hebt d’r gin idee van det het rechthoekige börd gin verplichting inhöldt vöar fietsers van betreffend pad gebruuk te maken.
Ik heb wel ‘ns geprobeard bromfietsers uut te leng det ze bie mie vöar het huus langs niet meung brommen. Doar mut ie nog verdomd met uutkieken. Het bent nog potige knapen, die brommerrieders van vandage de dag. Lest kwam d’r zelfs een toerclub met motoren langs. Dan kun ie better mar gewoon eam binnen goan zitten en hoppen det het oaver giet. Jongejonge, wat een lawaaimakers.
Andersömme nem ik met de racefietse nooit een fietspad met rechthoekig börd. Zo’n börd gif an det het vöar recreatief fietsen bedoeld is, en det loat ik liever oaver an een gezin met wichterties of opa en oma die d’r eam een stukkie tussenuut goat. Doar höar ik met mien snelheid van de racefietse niet tussen.
Mar as ik dan op de weg rieje, bent d’r altied chauffeurs die vindt det ik wél op det recreatieve fietspad mutte. Die gebruukt hun auto as moardwapen as ze mie de passe ofsniedt, op hun vöarhoofd wiest en doarnoa noar het fietspad.
“Leamsgevoarlijk”, roept ze, as het raampie open is.
Ja, inderdaad.
Denne van Knöldert.