Home / archiefcentraal / denne van knoldert asterix en de boerschop

denne van knoldert asterix en de boerschop

“Daag ons mar uut”, zeiden de neeje olders van Asterix en Obelix vöarige wekke in Nieuwsuur, toen de verslaggever vreug of d’r straks ok nog een kear een album met een avontuur in Nederland kwam. Noe prakizear ik mie al joaren de kop oaverdwars oaver een Asterix-verhaal in Salland. Mut het d’r noe mar van kommen dan?

‘Asterix en de Boerschop’ lik mie een fantastisch album. De Boerschop is het oaldste buurtschap van Luttenberg. Zie loat zich doar döar de pastoor van Luttenberg de lesse nog leazen. Mar zie stoat vöaran in de strijd as de gemeente Roalte Luttenberg onrecht andut zoas gin stoepe langs de döargoande weg.

Ik zie het stripboek al zo vöar mie: Alle dorpen in Salland liedt onder het juk van Roalte. Die int lukraak wat belasting en deelt het nog lukraker wear uut. Ok in Olst-Wieje mut ze rekkenschop hoalen met wat ze in det dure regeerhuus an de Zwolsestroate in Roalte ollemoal bie mekare uutprakizeart, want die buurman meent det ze alles noar zich toe kan trekken. Mar gelukkig is d’r völle teengwerking vanachter de bureau’s in det marmerpaleis, zodet het meeste mislukt wat töt uutvoer ebracht wördt. Bureau-cratie, nuumt ze det in Luttenberg.

Alle dorpen in Salland bint onderwörpen an de macht van Roalte. Behalve… De krijgers uut de Boerschop hebt met Stöppelhaene nog uutelegd hoe de Luttenberg ontstoane was. Een reus met een zak zand op de rugge heuld pauze in Salland en toen is d’r zand uut die zak elekt. Met zo’n stoer verhaal gooi ie oe de wapens niet an de voeten van de baas.

Het is d’r vrolijk leam in Luttenberg. De onderlinge verbondenheid is ongekend. Ieder weekend is d’r wel een feest. Dan vloeit de vermaarde toverdrank rijkelijk. Iens per joar graaft ze gat en tikt ze zwienties en et ze die ‘s oams op. Bard Höllenboer dut dan een stukkie.

En ondanks alle bedreiging van butenof loopt de kleine wichter de hele dag lekker onbezörgd te ravotten in de zandofgraving die de koele heet.

Het Luttenbergse volk is onverzettelijk döar de toverdrank. Die is zo vermaard, det de bard van het dorp al ‘ns eroepen hef det as oe kalf niet zoepen wul, dan mu’j ‘m bie SDOL op de voetbal doene. SDOL. Samenwerken doet overwinnen, Luttenbergser kan het niet.

Wie dut d’r met öm zo’n Asterix-bundel van de grond te krieng?

Denne van Knöldert

Lees ook

Broeklandse amazone doet mee aan EK springen in Le Mans

Sylvie Ruissen: ‘Na mijn ongeluk begin 2020 heb ik er hard voor moeten knokken’ BROEKLAND …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.