Home / archiefcentraal / denne van knoldert earste college

denne van knoldert earste college

“Wie hebt een treinstel te weinig bie ons en döarumme is het te druk”, leggen de intercom in de trein uut wrum of ik mosse stoane in de ochtendspits van Roalte noar Enschede. En druk, det was het. Of wule in het gangpad wat döar wollen schoe’m, want bie station Almelo konn’ ze d’r niet mear in.

Uuteindelijk leupen wie zo völle vertraging op det ze in Hengelo besleuten agis niet mear verder te goane töt an Enschede. En doar kwam an het licht det ze het bie de ofdeling communicatie ok heel druk hadden.

“U kunt overstappen in de sprinter die vanaf 3b vetrekt om 7.38 uur.” Mar op spoar 3b stund de trein noar Oldenzaal. En eam later stund op de mededelingborden det d’r öm 7.48 uur een trein noar Enschede vertrök vanaf 3a. Het is mooi te ziene hoe grote drommen mensen zich langs het spoar begeeft van a noar b en wear ömme met ollemoal in het achterhoofd ‘dit zal ok wel niet kloppen’.

Een collega van mie was het al snel zat en besleut het leste stukkie met de busse te goan. Tien minuten later werd d’r ömme roepen det d’r hillemoal gin intercity’s mear noar Enschede zollen goane die ochtend. Dus mos ik ok met de busse.

Op het busperron stund – toen ik d’r an kwam – volk vöar zes bussen, mar d’r kwam d’r mar iene. Die stoppen precies vöar mien neuze, dus kon ik noar Enschede. Mien collega kon d’r niet mear in…

Met een uur vertraging kwam ik bie station Enschede an, woar ik mensen tröffe die vanuut Roalte een uur later dan ik, met de trein noar Enschede waren egoane. “Bent d’r treinproblemen dan? Niks van met ekreeng.” …

Det spöllen zich ollemoal of an het begin van het schoeljoar. Ie kunt merken det d’r inmiddels minder studenten met reist, want wie kunt wear gewoon zitten in de trein. “Zollen al die studenten op kamers egoane weane?” vreug ik mie of. “Of det ze al wear e stopt bent met de opleiding…” bedach een reisgenoot. “Nou”, zei de meest deskundige bie ons in de coupé, “ik denk det ze inmiddels zo gewend bent an de neeje schoele, det ze het andurft öm gewoon niet mear noar de vrogge college’s te goane”.

Denne van Knöldert

Lees ook

Woningcorporaties regio Zwolle doen beroep op gemeenten: ‘Maak nieuwbouw mogelijk’

ZWOLLE – De negen woningcorporaties in de regio Zwolle doen een dringend beroep op gemeenten …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.