Home / archiefcentraal / denne van knoldert opvoeddiploma

denne van knoldert opvoeddiploma

Vakantie is de mooiste tied öm an te tonen det d’r neudig een opleiding vöar opvoeden mut komm. Op vakantie leaft iederiene op stroate of in de achtertuin en dan krieg ie d’r een boel van met.

“As ie noe nog ien kear zo dichte bie het water komt, dan krieg ie straks gin ijsie mear,” zeg vader. Woarop moeders kwoad wördt en haar ‘liefje’ uutleg det zo’n kind mut begriepen wat dan precies het bezwoar is van kort bie het water spöllen, öm precies te weane, kort bie de Waal. Dus moeder dut het vöar: “Schattepattie, mamma hölt zo völle van oe, det ik oe niet graag kwiet rake.”

“Dus det is better?” reageert papsieflapsie, “misschien vindt zie het hillemoal niet erg um zonder oe verder te munn’.”

Ik dache: det wördt vannacht direct sloapen. En ik zag det honneponne lekker döarspöllen an de Waalkade.

Ik weet an de gemeente nog wel een capabel iemand vöar controle op opvoeders. De hoog verstandige ambtenaar weet zelfs det alle burgers in het dorp het mooier vindt as de kozienen horizontaal in plaatsen van verticaal in mien nieuwbouw komt. Tied hef e ok zat, op de ofdeling bouwvergunningen hebt ze de neuze al lange löag.

In vakantietied goat vaders ok met de supermarkt in. “Wul ie die fles cola? Is goed, ik hoal het wel in van oe zakgeld.” En bie de gruunte: “Wule koopt broccoli, dus dan weet ie det ie det vanoamd mut etten, en ik wul d’r gin gezöar van hemm’.”

Vakantie, ok een mooie tied öm de wichter met völle gevuul vöar opvoeden te learen fietsen. Ik wol op het fietspad langs pappa die zien dochter rie-lesse gaf. “Rechts blie’m”, zei de instructeur rustig en kalm. De dochter wankelen op haar drie achterwielen noar links. “Rechts blie’m fietsen”, schreeuwen pappa. Zien dochter veul van schrik bienoa van de fietse. “Rechts, en noe gauw…” En toen wiebelen het peardestattie zich noar de juuste kante.

Met het inhalen zeg ik “misschien better det ie haar earst leart wat links en rechts is?”

Bie de cursus ‘opvoeden’ mut dan ok an bod komm det wichter het meeste leart van ofkieken hoe de oalders het doet. Op zundagmiddag te völle bier drinken, vloeken achter het stuur, roddelen oaver de buren en ruzie maken woar de wichter bie bent.

Zonder diploma, gin kinderen, is mien vöarstel.

En ik ben wel beneejd op opvoedkundige staalties die ule metmaakt.

Denne van Knöldert

Lees ook

Bijeenkomst OVKK en Stimuland in teken van leefbaarheid

HEETEN – Stimuland en OVKK organiseren op 21 november een interactieve bijeenkomst voor initiatiefnemers en …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.