Home / archiefcentraal / denne van knoldert miegempe

denne van knoldert miegempe

‘Ik heb mie noe een mooi plat woard ehöard’ sturen Jan Leenhouts een mail rond an een groep platproaters, ‘kent ule det ok?’ En het woard was ‘vlieg-ente’. Nee, doar had ik nog nooit van ehöard. ‘Piel-ente’, det kende ik wel. Det is een voetballer die zo lange met zien schijnbewegingen döargiet, det e oaver zien eigen biene stroekelt.

Mar vlieg-ente… Zollen d’r ok niet vliegende enten weane? Noe is Jan niet een echte Sallands platproater, dus beproeven ik hem met de zinne ‘den kjel vrög ‘t meanse of e stoete bie zich hef vöar de wichter’. Ik heb de vertaling van Jan nog tegoed. Wie het weet, mag het zeng (op de site). Ik verlotte een mooi columnbuukie van miezelf vöar de goeje oplossing.

Jan bleek zich vergist te he’mm. Hij bedoelen niet vlieg-ente, mar miegempe. Mieg-empe. Een mier. Van een van de platproaters (Gerrit Jan Martens uut het Vechtdal) kreeg hij antwoard, det ik ule niet wulle onthoalen.

Het woard miegempe bestiet uut mieg en uut empe.

Een empe kump van emete (old Duuts) en emmet (old Engels) en betekent mier. Ant (Engels) is ok een miere. Emmet kump van meita en det is ‘knagen’. Die ‘e’ an het begin van emmet (e-meita) is een vöarvoegsel det ‘altied of eeuwig’ betekent. Een een altied mar knagend beessie. Net as de mijt (meita).

Ik vind det prachtig, die etymologie. Wat leart ze mie oaver mieg?

Ik mieg, hij miegt, lig niet zo te miengen. Juust, ‘miengen’ is ‘zeiken’. Ik kieze bewust vöar ‘zeiken’, want ‘urineren’ of ‘plassen’, wat het eigenlijk ok is, is te netties vöar ‘mieng’. Wat hef een miere te maken met pissen? Nou, ömdet een mierenhoop rök noar urine. Det kump ömdet ze stikstof ömmezet in ammoniak. Keldermotten doet det ok. Hun huussie rök ok noar pis. Die hebt döarumme as biename ‘pissebedden’. (Keldermotten: ie komt ze teeng in kelders en andere donkere koele ruumtes, de onderkante van zo’n beest lik op een motte, een zeug, een vrouwtiesvarken.)

Een miegempe, ‘t is dus gewoon een zeikbeest. Zelfs in het Engels, doar nuumt ze de miere een pismire.

Denne van Knöldert

Lees ook

In beeld: Sinterklaasintocht Raalte

RAALTE – Direct na de intocht in Apeldoorn ging de Sint door naar vele andere …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.