Home / archiefcentraal / denne van knoldert 53 des echt oald

denne van knoldert 53 des echt oald

Iets sneller dan ule van mie gewend bent, kom ik d’r disse gedenkwaardige dag in, met een extra column. Ien kear earder in mien Denne-bestoan deud ik det: toen was het kabinet op Curaçao evallen. Op det eiland is het doarnoa nooit mear ewönn wat het was. Politieke intriges, oavervallen, moarden, zie bent de weg kwiet doar.

Vandage is het net zo’n gedenkwaardige dag. Denne is 53 ewönn. En het wördt nooit mear hetzelfde. Vöar mien gevuul is det een definitieve ömslag in mien leam. 50 Wönn was nog een soart van grappie. Abrahams van de familie, de buren en de kammeroaden in de tuin. Nog gewoon met kunn komm bie het hard lopen met de jonge garde. Net nog an kunn’ pikken as het öm de hedendaagse popmuziek giet. En in kunnen vulen hoe een jongere in het leam stiet, ömdet det bie oe zelf ok nog dichte in de buurte is.

Toen ik 47 was, zei een student teeng mie: “ie zult wel 50 weane.” Ik heb mie d’r bie near elegd det ze mie tut en met mien 52-ste joar wel ‘ongevear 50’ zult vinn’. Mar die periode is noe vöarbie.

Döarumme is vandage een gedenkwaardige dag. Ik ben definitief een oale man. Met hardlopen ben ik blie det ik mie kommende winter in het Sallands Cross Circuit in kan schriem bie de 50-plussers, want det jonge volk kan ik niet mear bie benen. Van de muziek die ik op de radio höare ken ik niks mear, d’r bent zelfs zenders woar van ik het bestoan niet wusse. Mien autoradio stiet doar op as de wichter de waang met ehad hebt. Want zie hoeft niet mear ehaald en ebracht te wönn. En van het leam van de hedendaagse jeugd, begriep ik denk ik alles nog wel, mar die zelfde jeugd pikt het niet det ik ze nog donders goed begriepe.

Kortom, 53 is bliekbaar een psychologische grens tussen jong en old.

Tut slot wul ik iederiene die mie via Facebook gefeliciteard hef, bedanken. Ik heb nog eam noa ezöcht of d’r een automatische antwoord-generator opzit (ja, det kan ik heus zelf nog wel), mar det is het niet geval. Dus alle felicitearders hebt det eigenhandig edoane. Mooi man. En dank.

Ik pakke zo mien earste pilsie en goa op weg noar de 60.

Denne van Knöldert

Lees ook

Carolien: Drugs of medicijn?

Een 70-jarige mevrouw komt voor begeleiding van het gebruik van cannabisolie, CBD-olie of wietolie voor …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.