Home / archiefcentraal / denne van knoldert twee derde

denne van knoldert twee derde

Sharon Dijksma twitterde vöarige wekke det het gin pas geef det wie een derde van ons etten weg gooit. Kent ule Dijksma? Ik denk det zie vindt det wule det derde deel d’r bie op mut etten.

Mien gedachte oaver al det weggegooide etten giet de andere kante op. Wie kunt van die twee derde die wie op et, ok de helfte nog wel missen. Ik zagge lest een foto van een schoelklasse uut 1954 en doar waren de wichter gemiddeld de helfte van wat de wichter noe schone an de haak doet.

En ik heb zelf ok zo’n ervaring. Tien joar terugge scheef ik een column onder de kop ‘Denne wul dunne wönn’, nou, zo wied is het noe ok wear en ik kwame d’r noa een wekke al achter det ik met de helfte minder an etten, ok gin honger kriege…

Dus det wie een derde van het etten weggooit… het mag nog wel wat mear. Of eigenlijk: wie mut minder inkopen, minder kokken, minder opscheppen. Woar zit ‘m die weggooierieje in? Bie mie thuus geböart det niet. Sinds ik niet mear kokke lust de wichter het etten ok wear. Doarbie hebbe wie een köppeltie kippen, die teeng ettenstied al bie de keukendöare positie innemt.

Ik heb wat rond evroagd oaver etten weggooien. Toen höaren ik van meansen die allenig mar vers brood wult dus iedere dag het oale brood weggooit, van mensen die niet van kliekies hoalt dus nooit het etten van gisteren opwarmt en van mensen die de uuterste holdbaarheidsdatum van de melk geleuft.

Tja, dan giet d’r heel wat etten de prullebak in. Mar hoe erg is det? Det wie gin etten weg mag gooien, is volgens mie zo’n typisch Nederlands calvinistisch dingetie. Wie denkt det het te maken hef met honger en armoe in andere delen van de wereld. Mar d’r is oaveral etten zat. Gebrek an geld, dét is volgens mie het probleem. En ik kan oe verklappen det wie doar niet een derde van weggooit.

Of ie mut belasting betalen ziene as geld weggooien. Det de minister van leugens en defensie d’r dan neeje gevechtsvliegtuung van giet kopen. Zó dom! Van de gedachte achter zo’n ankoop kan ik gin soep kokken. En det doe ik dan ok mar niet, want dan zit ik wear met een oaverschot an etten.

Denne van Knöldert

Lees ook

Bloembollen poten in Olst

OLST – Eetbaar Olst-Wijhe gaat op zaterdag 30 oktober duizend biologische bloembollen poten op het …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.