Home / archiefcentraal / denne van knoldert gin 18 mear 2

denne van knoldert gin 18 mear 2

Vöarige wekke vertellen ik al det ik op de operatietoafel terechte kwamme noa een sprong van een rots in zee. Een slaplaesie had ik d’r an oaver ehoalen. “Ie bent gin 18-e mear”, zei mien vrouw, toen ik de sprong vöarstellen. Mar ik had de hele wekke vanof het strand de locals uut Curaçao de zee al in zien springen. Schik det ze haa’n, as ze met de kop zwaaiend, spetterend wear boam water kwamen… det wol ik ok.

Ik was al onder die rotsen weazen snorkelen öm mie d’r van te verzekeren det de zee diepe zat was. Het veul mie toen ok op det de iene rots de andere niet was. Vanof het strand leken ze gelieke. Mar vanof zee, met de snorkelbrille boam op de kop, zag ik det de linker rots een stuk hoger was. Zol ik straks van de hoogste of de laagste rots springen. Hinderlijk denkwerk, wegens latente hoogtevrees, mar ok ömdet d’r zolt water via het piepie van de snorkel in mien mond kwam.

Een weekend lang heb ik het an egluurd. Toen de lokale bevolking op moandag gewoon wear an het werk was en wie het strand delen met allenig mar toeristen, hakken ik de knoop döar. Vandage mos het mar geböaren. Dus ikke met een ömweg noar de rotspartieje. Dochterlief ging met, want die had ok wel oaren noar zo’n heldendaad. Earst rechtstreeks noar die hoogsten, die ik vanuut zee uut eköazen had. Toen toch nog mar eam de lagere variant, want vanof het lanceerplatform was de zee völle verder weg dan gisteren de rots vanuut landingsplaats. “Pap, wie nemt die hoogsten”, klunk het zelfverzekerd noast mie. Tja, wat rest oe dan nog…

Ik sprung earst. Öm de vöarkomm’ det ik niet te diepe weg zolle schieten de zee in, heult ik mien armen gespreid. “Dom, dom, dom” zeg iederiene noe achterof. En inderdaad, gekruust vöar oe lichaam langs, is handiger, want dan had ik mien linker arm niet flink verrekt. Die arm bleef namelijk op het water hangen, terwijl de rest van Denne noar de zeebodem wol.

Ik kan oe verklappen det det knap zear deut. Wel piene, mar ok mooi van een rots esprung! Dus met een gevuul van trots pakken ik ’s oams het fototoestel öm het bewies nog ‘ns terugge te ziene. “Nee, doar heb ik gin foto’s van emaakt”, zeg mien vrouw.

Denne van Knöldert

Lees ook

Plannen nieuwe inrichting N337 bij Den Nul en Olst ter inzage

ZWOLLE – De plannen voor een nieuwe inrichting van de Rijksstraatweg (N337) in Den Nul …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.