Het kwam ollemoal saams vöarige wekke. In het eindexamen stund een tekst oaver immorele vleesetters, het CDA is bange det wichter die teksten geleuft, eam later bleek det d’r ESBL in bienoa alle vlees zit. En noe hebt ze het eeuwige leam ok nog ontdekt.
Met een bittie gezond verstand zol het CDA munn hoppen det wichter het examenverhaal oaver de gezondheid van vegetariërs, of liever de ongezondheid van vlees etten, wél geleuft. Boeren wult hun dieren niet ziek hemm en gebruukt döarumme royaal antibiotica. Zonder een krimp te gee’m kon det gebruuk de leste joaren met 50% ofnemmen.
Ik denk det het nog wel wat minder kan. Ik denk det het zelfs zonder antibiotica verder mut. Want uuteindelijk kump det spul via de ESBL-bacterie in mien lief terechte woarnoa bie mie in vöarkomend geval de broodneudige antibiotica niet mear werkt…
Ik vind het ok wel grappig te leazen det een CDA’er bange is det kinderen iets geleuft. Jammer vöar het CDA zelf misschien, mar de wichter van noe bent nie zo goed geleuvig mear. De wereld in zeum daang ‘eschapen? Zie lacht d’r ömme.
De ESBL zit in honderd procent van de kip en sinds van de wekke wete wie det het ok vöar 40% in vis en rund zit.
“Goed oe vleisplankie schone maken”, gaf minister Schippers as tip mee. Die is van de volksgezondheid. Hoe hopeloos kan een advies weane. Heb ie wel ‘ns een bacterie probearen te vangen? Ik wel. Ik ben specialist in amoebes en pantoffeldierties. Mar het bakkie woar ik de gevangen exemplaren in verzamel is nog heel löag.
Van de wekke was ok in het neejs det het DNA-streng ontdekt is, det ons old maakt. En noe kunt ze die streng manipulearen, zodet wie niet mear dood hoeft te goane. Det hef individueel grote vöardelen. Mar maatschappelijk gezien ok noadelen. Zo raakt ule nooit mear van mie of.
Mensen die het ESBL-bacterie hebt en antibiotica neudig hebt, doar helpt de nieuwe ontdekking ok niet op. Alp d’Huzes mut mar snel een andere instek krieng: gin inzameling vöar onderzoek noar kanker genezen, mar onderzuuk öm kanker te vöarkomm.
Grootste probleem lik mie toch wel de hemel. Want as d’r niemand mear doodgiet, zult ze doar last krieng van löagstand. Verpaupering van de hemel, ie mut d’r toch niet an denken.
Denne van Knöldert