denne van knoldert drankslot

Het is mien theorie det d’r in de maatschappij sneller wearstand ontstiet teeng bepaalde zaken as journalisten d’r persoonlijk last van hebt. Lest met die nivelleringsplannen van het kabinet hebt ze det ok wel toe egee’m. Bie de Telegraaf werkten völle journalisten die mear ziektekostenpremie zollen munn goan betalen öm wat van hun riante salarissen of te trekken.

De wearstand teeng zulke plannen is makkelijk te regelen, journalisten schrieft d’r dan gewoon verhalen oaver. Döarumme is d’r de leste tied ok völle andacht vöar peardevleis en niet biologische (poas)eieren. Journalisten bent gezonder goan etten. Öm die zelfde reden wul het met het rookverbod in Nederland niet lukken. Döarumme bestiet de hypotheekrenteoftrek nog steeds. Journalisten bent teeng.

Bijstandmoeders en werklozen kriegt minder andacht, journalisten bent det per definitie niet. Ik moche hoppen det d’r mear journalisten getrouwd waren met iemand in de zorg, want doar kunt ze ok nog wel wat andacht gebruken.

Ik zat een tiedie terugge noar een discussie te kieken in Edned, de talkshow van RTV Oost. Het ging oaver hoe terecht een alcoholslot is. Det is een bloastest die het starten van de auto blokkeart as ie te völle drunken hebt. An toafel een journalist: Rob Vorkink. Vorkink was epakt met zes borrels op. Hij probearen met de kop vol drank noar huus te riene. Hij werd an ehoalen nog vöar e d’r iene dood had e rene.

Vorkink: “Ik heb niemand iets an e doane, het was de earste kear, dus ik vind het nogal een zwoare straf det ik noe earst altied in det drankslot mutte bloazen as ik in de auto stappe.” Ik dache: het is döar journalisten det wie in Nederland nog steeds wat makkelijk doet oaver drank en de gevoaren d’r van weglacht.

“Ik heb toch niemand an erene?” En “Het was pas de earste kear”. Ten earste waren die zes borrels (een derde liter) natuurlijk tien borrels (een halve liter). En de earste kear? Ja, de earste kear det e an ehoalen werd.

Ie kunt ok zeng: het is bewust een poging töt moard, met voorbedachten rade. Doar stoat zwoardere straffen op dan zo’n alcoholslot in oe auto.

Of ie noe het ien of het ander zegt: as journalist bepaal ie d’r de publieke opinie en het gedrag van anderen met. As ie wat edoane wult he’mm mut ie een journalist ömme kopen. Geef ze mar jenever.

Denne van Knöldert