Ik las vöarige wekke in de krante een stroatproat oaver de neeje name van Nederland 1, 2 en 3. Det mut NPO 1, 2 en 3 wönn. Zoiets doet ze öm te vöarkommen det mensen snapt woar het oaver giet. En ömdet het goed is vöar de werkverschaffing.
Toen Windesheim een joar of tiene terugge de C van Christelijk minder belangriek wol maken (al die studenten reupen de hele dag van ‘kut, wear een onvoldoende’, dan kun ie better de C weghalen, dan het gedrag anpassen) mos d’r een neej logo komm. Det hebt ze in twee stappen edoane, öm de oavergang wat geleidelijk te loaten geböaren. Zie hebt toen earst een kleine verandering döar evoerd en een joar later wear iene. Ik werken doar toen en heb briefpapier en enveloppes met enömm die bie het old papier near ezet wönn. Een klaslokaal groot en een meter hoge, zo völle papier ging d’r vot. En een joar later dus nog een kear, mar toen had ik het papier van het joar doarvöar nog niet op. Noe nog niet.
De stroatproat veul mie op, vanwege de gemeentelijke advertenties d’r noast. Ik zagge wie d’r ollemoal een ömgevingsvergunning anvreug. Det was vrogger een bouwvergunning, wat het nog wel is, mar het heet niet mear zo. Ik had vöar mien huus een ok achterof al gecontroleerde en goed gekeurde ömgevingsvergunning, toen ze van de provincie vunn’ det mien zonnepanelen niet op de grond, mar op het dak mossen. Toen bleek ineens det de ömgevingsvergunning nier oaver de ömgeving ging.
Oe sofinummer is ok zo’n ding. Det heet noe burgerservicenummer. Mar zie zet d’r nog altied wel tussen haakies achter det det vrogger anders heetten. Net as op de site van de KPN woar achter ‘vroagen oaver email?’ stiet: (vrogger hetnet).
Ik kwam in de folderrekken van de gemeente Roalte ‘de kr8 van Roalte’ teeng. Det is wat anders dan de Kracht van Salland, woarvan ok de meesten niet weet wat det is. Kr8 giet d’r oaver det oale luu in ’t vervolg earst zelf mar mut kieken of ze zich kunt redden met hulp van de wichter of de buren. Det is niet zo’n fijne (mar wat mie betreft wel een goeie) boodschap, dus det kun ie better mar verstoppen. Kr8, det snapt die oldere doelgroep dus niet. Dus least niemand die folder.
En det is precies de bedoeling.
Denne van Knöldert