Ik zat van de wekke noar het Journaal te kieken. Het ging oaver een verstopt rapport oaver het spoar, een banke die de kluit belazerd had, een wielrenner die zei det e twaalf joar dope gebruukt had en een politieke partieje in Spanje die… och, wat kan ons det schellen.
Niks is wat het lik.
Det rapport oaver het spoar ging oaver slecht onderhold. Minister Schultz had ezegd det det rapport noar de Twidde Kamer mos, mar ambtenaren besleuten het in een la te verstoppen. Ik heb zelf ok zulk soart ervaringen met een provincieambtenaar die in zien vrieje tied roadslid is in Dalfsen. Die had zien belofte an mie ok in een bureaula verstopt. Toen het op uutbetalen ankwam, kon hij zich van een la niks mear herinneren. Ie doet niks an die witte boardenmacht.
Minister Schultz is van het departement ‘130 kilometer, mear verkearsdooien en niet sneller thuus’. Niemand weet mear hoe hard ie woar mag riene. Het zol mie niet verbazen as die ambtenaren het rapport in een la stoppen op last van de minister. De betreffende ambtenaren goat straks met een golden handdruk vervroegd met pensioen en Schultz wast haar handen in onschuld.
De Reaalbanke is op’ekocht döar de staat en de nieuwe directeur krig een half miljoen an salaris. Onze minister president verdedigt det, want het werk van die directeur is heel muuilijk. Het geef an det het in de bankenwereld nooit mear goed kump. De directeuren blieft oons begappen, met rugdekking van de politiek.
Het is mooi te ziene hoe onze volksfascist Wilders doar iedere kear op anslöt. In Oostenrijk vund zien college Haider zien Waterloo pas noa zien dood. Die bleek d’r een geheim lea’m op noa te hoalen woarin hij alles deed wat hij in zien zichtbare lea’m verketter’n. Ik denk det d’r van Wilders ok weinig oaverblif as wule weet hoe hij zich löt financieren. As e vöar die tied mar niet an de macht kump.
Det Rasmussen twaalf joar gedrogeart hef, det hölt mie nog het meeste bezig. Het schient det ik in de Tour-uutslag van 2008 stoa, ömdet ik toen een dag vöar de Tour uut, clean de alp ‘d Huez efietst hebbe. Bie die Spaanse dokter was mar dertig procent van het bloed in de diepvries van wielrenners. D’r zol ok bloed bie zitten van Spaanse voetballers. Ik denk det Nederland uuteindelijk toch nog wereldkampioen giet wönn in 2010.
Denne van Knöldert