Home / archiefcentraal / denne van knoldert ozcan akyol

denne van knoldert ozcan akyol

Geld maakt niet gelukkig, höaren ik iene zeng. ’t Is een dooddoener van de hoogste orde. Ie kunt d’r niet zo völle teeng in brengen, want iederiene zeg det altied en het zal wel heel verstandig weane zo te denken. As jong Knöldertie had ik mien earste salaris van vakantiewerk in het broodtrömmeltie achter op de fietse doane. Trömmeltie verlöaren. Geld weg. Wie toen ezegd had det geld niet gelukkig maakt, had ik lijfelijk an het verstand ebracht woar ie ollemoal dan wel ongelukkig van wördt.

’t Ok een opmerking van het zieligheidsoffensief. Hef de hele buurte net een mijoen ewunn in de postcodeloterij, had ie gin lot. ‘Och, geld maakt niet gelukkig.’ Een bittie het zelfde as ‘wul ie wel iens een goeje klap vöar de bek hemm? Ie altien met oe rotopmerkingen?’

‘Geld maakt niet gelukkig’, las ik lest op een wc, woar ze nog lekker olderwets spreuken op de wand kliederden, ‘mar ik hule liever in een Ferrari dan op de fietse.’ Kiek, det is tenminste nog een relativearing woar ik wat met kanne. Het was toch al wel een wc van nuance. ‘Ha dader, wis al je sporen uit’ las ik op de mure. En ok: ‘het is niet alleen geld dat er stinkt’, ‘grappen aan deze wand zijn beter dan die grap in je hand’, ‘geluk alleen maakt niet gelukkig’, ‘geld maakt niet gelukkig, maar gelukkig maken ze geld’ en ‘ik verdien veel, jammer dat ik het niet krijg’. En de oaverienkomst tussen erwtensoep en een vrouw.?Ik weet niet zo goed of die wel kan. Mar het stund op die wand: as ze pruttelt, mut d’r een worst in.

Ik heb d’r met genot ezetten en vergat zelfs de grote boodschap döar te trekken. D’r was nog flink wat verfrisser neudig de lucht te neutraliseren. ‘Dank vöar de stank’ heb ik d’r nog gauw bie eschreem.

De Deamter schiever Özcan Akyol, die hef learen leazen en schriem in de gevangenis, zag ik lest bie ‘24 uur met Wlfried de Jong’. Hij preut niet mear zo scherp noa drie kwart Jack Daniels whiskey. Mar zien redernaties werden wel rauwer, kwamen dichter bie zien roots van verstoten zoon en veroordeeld oavervaller. ‘Geld maakt niet gelukkig’, zei de Jong. Doar had onze Deamter vriend langer oaver noa edacht en in zien antwoard raken hij de kern van de onzin van de spreuk: “Armoede ok niet.”

Denne van Knöldert

Lees ook

Voedsalland Boerenmarkten in Luttenberg

LUTTENBERG – Museum De Laarman in Luttenberg presenteert op de zaterdagen 24 en 31 juli …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.