Ik ben wel een bittie van het gezonde etten. Ik zie mien lichaam as een chemische fabriek. As ie doar verkearde dingen in gooit, kan d’r zo mar wat ontploffen. Op stroate zie ik soms een chemische fabriek vöarbie komm woarvan ik mie ofvroage of die het rampenplan wel goed op orde hef.
Wat te denken van vruchten op sap. Het schient det die vruchten earst in zoltzuur ligt, öm de nerven te verwijderen die de schil van mandarijn en sinaasappel op de parties achterloat. Doarnoa goat ze in een tegengif.
In sukervrieje cola zit aspartaam en doar krieg ie kanker van. In koekies zit verborgen vetten en het schient det d’r in chips een E-nummer zit det oe verleidt nog mear te etten. Det verslavingsspul gebruukt ze in Frankriek in verzörgingstehuzen teeng vermagering van patiënten.
En ja, rundvlees in de lasagne is peardevlees, vlees dat earst heel Europa döar erene is öm oaveral subsidie op te halen en keuringen te vermijden. Det was noa de varkenspest of eschaft, mar niet heus.
Ik ben met bosschoppen halen zo fanatiek op zuuk noar ‘gezond’, det het bienoa ongezond is. Mar het vuult goed, ok al weet ik wel det al det etten met het predicaat ‘gezond’ net zo goed ien grote bedonderieje is. Het is net as met de autogarage. Ie mut d’r een goed gevuul bie he’mm, mar ie wördt heus wel bedonderd.
Noe de twee kleine Knölderties grote Knölderts an het wönn bent, kriegt die ok een eigen willegie.
De iene zweart bie patat met frikadel. Wat vöar mie as vegetariër vöaral op zundag een beproeving is. Frikadel, ui-snippers, mayonaise, völle mayonaise en patat, zolte patat. Met een biertie d’r bie. “Ja, ie wult toch altied gezond etten? Dus ofbliem”, krieg ik dan steevast een tik oaver de vingers as ik mee wulle snupen.
De ander kan het niet gezond genog weane. Die had lest ehöard det broen brood nog wat anders was dan volkoren brood. Broen brood kon namelijk net zo goed van witte meal weane met broene suker. Dus zie noar de winkel op zuuk noar volkoren brood. Det wönn nog een hele zuuktocht. An het eind van de dag kwam ze thuus. “Ik ben niet hillemoal in mien missie eslaagd. Zie haa’n neans echt volkoren brood, mar dissent is al wel een goed begin.” En zie leng een half volkoren brood op toafel.
Denne van Knöldert.