De dochter: Ik stuur oe vanoamd nog eam een whatsapp. Dus denk d’r an det ie oe mobile bie oe hebt.
Ikke: Goed det ie d’r an denkt mie det te vertellen, hoe late stuur ie oe bericht?
De dochter: Ja, bedankt vöar het compliment. Ik denk det het rond half achte wördt. Dan weet ik hoe late ik kloar benne zodet ie mie op kunt halen. En wul ie mamma nog eam zeng det het etten heel lekker was? Ikke: Wat goed det ie nog eam op het lekkere etten terugge komt. Mar half achte wördt ‘m niet, dan zit ik in bad. Fantastisch trouwens det ie ondanks oe blessure noar de tennistraining van oe team goat.
De dochter: Och, dan vöar het compliment, mar zie vind het leuk, dan doe ik het graag. Mar ie goat mar lekker in bad. Ik hoefe niet allenig, ik kan wel met iemand anders met fietsen. Die mut dan een stukkie ömme fietsen, mar det dut e graag, hef e mie net ezegd.
Ikke: Och, det vind ik lief van oe. Weet ie wat, dan geef ik straks de kippen nog eam een scheppie brokken en doe het hok dichte, dan ben ie d’r mo’nnvrog sneller kloar met.
De dochter: Wie bent een goed stel. En ie bent een top-vader.
Gelukkig doet wie det iedere dag niet op die maniere. Nee, dit gesprek vund 1 maart 2012 plaats. Het was nationale complimentendag. Wie waren wat an het ouwehoeren. Ik ben mear van het slag van ‘gewoon zeng hoe ie d’r oave denkt’. En dan allenig ás ie d’r ok wat van vindt.
Donderdag is het wear zo verre. 1 maart. Het scheut mie te binnen toen ik zundagoamd op de tv in het programma ‘De Reunie’, een man uut de klasse hoaren vertellen oaver zien gezin. “En ik heb drie prachtige dochters”, zei e. Thuus kreeng wule een foto te ziene van vrouw en dochters. ‘Prachtige dochters’… Echt een complimetendag-opmerking. Wat een lelijkers. En zie leken alle drie op zien vrouw. Nou, dan h’eb ie ok wat.
Toen ik later die oamd Studio Voetbal keek zag ik PSV-voetballer Lens Feijenoordverdediger Mathijssen op stoan wachten in de spöllerstunnel van De Kuip. Det leup hillemoal uut de hand. Wrum? Ömdet ze mekare niet goed begrepen. Ik ben d’r van oavertuugd det Lens allenig mar de complimenten wol gee’m an topverdediger Mathijssen.
Denne van Knöldert