Maxima is uut eroepen töt dom bontje. Zie en ien van de wichter had een bontkrage en een actiegroep teeng bont had det e’zene. Dan ben ie de klos. Ik zol zeng, het hölt meansen van de stroate.
Ik ben zelf altied erg in dubio as het giet öm vöar of teeng bont te weane. Onze VVD-minister van defensie was in een vöarig leam teeng weigerambtenaren, mar stemm’ toch vöar. Zo heb ik det bie bont. Ik ben teeng dieren vetmesten en ofslachten vöar etten. Het is mishandeling en de voedingswaarde van een dood stukkie vlees is net zo groot as tien kear de voedingswaarde die het varken d’r vöar mos vretten… Mar as het beest dan toch ien kear dood is, wrum zollen wie dan de vacht niet gebruken vöar klearen. Ik denk det het mear verspillend is de vacht weg te gooien.
Det Maxima töt dom bontje is uut eroepen, döar zal onze toekomstige koningin allenig mar blie van weane. As ze ongemerkt met al det bont öm de hals had elopen, was ze denk ik diep ongelukkig ewönn. Maxima wul namelijk in haar lea’m wél ezene wönn. Anders zol ze niet met onze toekomstige koning etrouwd weane. Weas earlijk, wat is d’r appetijtelijk an oonze prins Pils. ’t Is niet mear dan een dikke knapzak. Mar wel met een hoop geld. Een hele hoop geld. En een hele hoop macht.
Ik denk det het Maxima öm de macht giet. Det is ze van huus uut zo ewend. Haar vader was de baas op het ministerie van landbouw. En doar verdween d’r zo af en toe wel ‘ns iene. ’s Monns noar het werk en ’s oams nooit mear thuus ekomm. In Argentinië zit noe een Nederlands-Spaanse piloot gevangen die d’r van verdacht wördt vliegtuge bestuurd te hemm’ woaruut die mensen mossen bungee jumpen, mar dan zonder elastisch touw. Det hebt d’r niet zo völle oaverleaft. ’s Monns noar het werk, ’s oams niet mear thuus komm’. Maxima’s pappa wees in de koffiepauze de luu an die det oaverkwam. Mar het overtuigende bewies is nog niet rond.
Goh, wat een leuke vriendinne hef Willem Alexander. Vlot meanse. Mooi bontje ömme.
Mar terugge noar het bont. Woar lig de grens. Bie vlees etten? Bie bont dragen? Bie learen schoene? Bie kaas en vis? Bie een wollen trui? Bie katoenen kleare döar kinderhandjes gemaakt in India?
Mien grens lig bie woar ik mie lekker bie vule en wat een ander dut of denkt, mut e zelf mar weten.
Denne van Knöldert