Ik weet niet of ik noar de verkearde zenders kieke, mar ik heb dit joar opvallend weinig reclame vöarbie zien komm’ vöar Sinterkloas. Vrogger had ie nog wel van die vervelende kinderreclame met van die etterbakkerige wichter die mie as vader van een gezin noar de winkel mossen leiden vöar de anschaf van domme spellegies. Mar dit jaor mis ik ze.
Ik zit al vanof oktober te wachten op reclame van het spel woarbie ie me Chinese et-stökkies een opgebloazen ballon niet mut loaten knappen. Mar allenig De Wereld Draait Door hef doar reclame vöar e maakt. Doar zag ik ok reclame vöar Windows 8. Bie Windows 7 had Van Nieuwkerk oaverdag de introductie gepresenteeerd en had ’s oamds de Microsoftbaas in de uutzending. Dit joar haa’n ze het d’r wat minder dikke boam op elegd. Vaste wizzkid Alexander Klopping mog vertellen hoe goed verie 8 was.
Zol det het niveau vöar kinderen weane: een nieuw ingewikkeld computerprogramma met touchscreen? Misschien. Kinderen weet eigenlijk niet anders dan det ie een beeldscherm kunt ansturen döar d’r met de handen oaver hen te wrie’m.
Niet vöar kinderen, mar wel heel kinderachtig is de reclame van de man die per ongeluk een mobiele telefoon in de wasmachine gooit. An het eind van de reclame lik die telefoon van de man. Mar in het begin – ie mut eam goed lusteren – blik toch det e van zien vrouw mut weane. Foutje, bedankt.
Mar de beste kinderreclame is die reclame vöar een autoverzekering woarbie ie pas hoeft te betalen as ie 100% tevreden bent. Een EO-familie stiet in de berm een emmertje water döar te gee’m vanof de rivier noar iets wat ie earst niet in beeld kriegt. Net as de Von Trapp-familie uut de Sound of Music blieft ze vrolijk, hoe naar het leam ok is. As d’r al zes wichter het wateremmertie döargaa’m, met natuurlijk ok een zoon met een IPad in de handen, kump earst moeders in beeld en dan de dansende vader. Hij gooit het leste water oaver een volkswagenbussie. Feest det de boel in de fik stiet, want de verzekering betaalt de schade.
Kinderreclame, mar helaas is die reclame niet vöar wichter bedoeld. Het is vöar volwassenen. Earst kon ik d’r niet bie, hoe een reclamemaker zo dom kon weane vöar hillemoal een verkearde doelgroep zien filmpie te ontwerpen. Töt ik de dubbele boodschap zagge. Det blauwe bussie… die is van Yvon Jaspers. Stopt die met Boer Zoekt Vrouw?
Denne van Knöldert.