Op Kerstoamd oaverweug ik al mien medische gegevens an de oaverheid te gee’m. Zol mien electronische patiëntendossier doar veilig weane? Ik mut oe zeng det det een korte oaverweaging was, want iniens kreeg ik de Kersttoespraak van de koningin te ziene, terwijl wule toch echt of esprökken hadden det ik earste Kerstdag öm 12.00 uur moche en det de koningin zol wachen töt 13.00 uur.
Bleken ze haar toespraak ekraakt te hemm. Det was nog niet zo mulijk. In de internetname van die van vöarig joar hebt ze de datum anepast an vandage en kloar was Kees. Zo haa’n ze twee joar terugge de miljoenennota ok al iens evunn.
Dus mien patiëntendossier kriegt ze niet.
Beatrix giet straks zeng det wie vertrouwen mut hemm in de rechtsstaat, wie mut verdraagzaam weane. Mar ik heb d’r niet völle vertrouwen in. Een democratie met te völle ambtenaren krig zo allemachtig völle regels, det het een dictatuur wördt. Ie kriegt een bekeuring as ie gin net oaver de anhanger spant of de dakhelling van oe huus vief procent verkeard hebt.
De boom in met oe rechtvaardige samenleving as Wilders döar christeren gedoogd wördt. Via det gedogen was Hitler ok begunn. Mar ooh, as ie de oarlog d’r bie haalt. “Door de eeuwen heen putte onze maatschappij kracht door de aanwezigheid van mensen met verschillende culturele en levensbeschouwelijke achtergronden”, zeg de Koningin straks. Mar gin land woar d’r zo völle Joden bent ofevoerd dan hier.
De Belgische koning Albert II was mear recht vöar zien raap. ”De crisis van de jaren 30 en de populistische reacties die ze teweegbracht, mogen niet worden vergeten. Men heeft gezien welke rampzalige gevolgen dat voor onze democratieën heeft betekend.” Want zo stoat wie d’r wel vöar in Europa. Töt an de Twidde Wereldoarlog ging alles hetzelfde as noe.
Mar gelukkig hebbe wie dan de verdraagzame paus nog. Hij zol homoseksualiteit verketterd hemm, mar det blik bie nader inzien toch niet hillemoal zo. De man die zien pastoors verbiedt te trouwen heult allenig mar een pleidooi vöar het traditionele gezin. Het wegvallen van traditionele rolpatronen vindt hij ‘in strijd met de natuurlijke orde’. Kjels en vrouwluu mut doene woar God ze vöar mak hef. Det det binnen een huwelijk mut, hef e d’r noar zien eigen personeel niet helder bie zegt, denk ik dan.
Die vaste rollen, die past mie wel. de kalkoen die wie straks et, die hef mien vrouw gewoon emaakt.
In mien kersttoespraak roep ik alle hotemetoten op zich niet oaveral met te bemuuienhet en het lef te hemm de verantwoordelijkheid bie de meansen zelf te loaten. Dan zal het ok wel iens fout goane, mar vaste niet zo vake as noe.
Denne van Knöldert