Home / archiefcentraal / denne van knoldert sexy ine

denne van knoldert sexy ine

“Sexy Ine 50 jaar, maakt iedere patiënt zo weer klaar.” Ik kwam het börd teeng langs de weg en mien interesse was gelieke etrökken. Ik had wel vier redenen vöar die verhoogde andacht.

De earste reden was det ik doar twee joar terugge ok al zo’n feest in de berm ezene had. Ik kon mie d’r nog van herinneren det d’r toen völle borsten te ziene waren. Iets van det de boer net zo trots op de uiers van zien koeien was as op die van zien vrouw. Zeg noe niet det ik det ollemoal niet mutte schrie’m, öndet det zielig is vöar Abraham en Sarah, want ik zette die dingen ollemoal niet in de tuin. Det doet de moaten. En d’r is mear volk det dagelijks langs die börden ridt, dan det disse verhaalties least.

De twidde reden is det ik mie ofvroeg of hier niet de oplossing vöar het ziekenzorgsysteem an de weg stund. Wie hebt het noe namelijk al twee wekken oaver de heugte van de zorgpremie, mar ik höare d’r gin iene oaver het vöarkommen van ziek wönn. Ik kan mie vöarstellen det vöaral mannegies gezond blieft bie de anpak van Ine. An de andere kante lik het mie ok wel het simulearen van ziekte in de handen te werken. Wie zollen d’r zo mar een heleboel hypochonders bie krieng. Mar ik zol het een kans gee’m

De derde reden is det het mie ernstig bezighölt wat mensen ollemoal bie mekare in de tuin zet. Zo heb ik al iens een hele tuin vol met bierkratties zien stoane öm een baby welkom te heten. Die was al verslaafd vöardet e de earste moedermelk edrunken had. Zelf had ik een oale denneboom in de tuin stoane toen ik vieftig was ewönn. Denne is oald, stund d’r onder. Mooi bedacht.

Ten vierde was ik mear dan gemiddeld geïnteresseerd in het börd, vöaral de tekst, ömdet ik vanoamd bie de buurman een Abraham goa plaatsen. En in de buurte ben ik zo’n bittie an ewezen as de stukkiesschriever vöar het spandoek d’r noast. Ik mut d’r nog eam goed oaver noadenken, want het mut natuurlijk wel oaver de buurman goane en niet oaver zien vrouw.

Denne van Knöldert

Lees ook

KokkieBikes Hellendoornse bossentocht voor mountainbikers

LEMELERVELD – Cycling Lemelerveld presenteert op zondag 31 oktober de KokkieBikes Hellendoornse bossentocht. Er zijn …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.