D’r was een trein estrand tussen Zwolle en Ommen. Dus mossen wie met bussen vervoerd wönn. Een hele onderneming is det. En frustrerend ok, want het was al late op de dag. Mar vöaral ömdet ik niet wus wrum ik vertraging had. Öm de ien of andere reden denkt de NS det het goed vöar mie is niks te weten.
Macht corrumpeart, zegt ze. Zo gauw zo’n NS-baas völ te völle verdient, denkt hij te kunnen beslissen det het better is de reiziger mar niet te völle mee te delen. En dan wörd ik kwoad op zo’n bedrief, op de baas van zo’n bedrief.
Noe kreeg ik in het leger al een S5 wegens extreme muuite met autoritair gezag. En de psycholoog die det op papier zetten, kan ik noa dertig joar wel toegee’m, had det donders goed in eschat. Ik kan mie wel bedwingen as d’r een baas in de buurte is. Mar as ze ’t d’r noar maakt, dan sloa ik an as een slecht ofgerichte herdershond.
Bankdirecteuren die zwemt in de bonussen terwijl ze landen an de afgrond brengt, burgemeesters die van riool- noar gifschandaal hobbelt, iederiene en alles teeng zich in het harnas jaagt, mar nooit iets vöar de rechter kriegt, schoolmeesters die wichter op drie tiende punt loat zitten, de VVD die criminelen harder wul anpakken op hun eigen corrupte bestuurders noa, de belastingdienst die noa 25 joar keurig op tied betalen, mie een boete geef wegens twee dagen te late betalen, alle leiders van de wereld bie mekare die drugs blieft bestrijden in plaatsen van het vrie te gee’m en zo twee derde van de wereldcriminaliteit zollen oplossen… Gek wörd ik d’r van.
Wie zaten in de busse die ons vanwege die weigerende trein noar Ommen brach, toen ik op de radio höaren van het rapport oaver uutvallende treinen van de vöarige winter. Det kwam niet döardet NS en Pro Rail oavervallen waren döar het slechte wear, nee, de heren wussen det wel, zie haa’n allenig slecht met mekare gecommuniceerd…
Het is dus niet allenig zo det de graaiers hun werkvolk opdracht geeft niet te communiceren, zie doet het zelf ok niet. Misschien det ze vöarig joar net de joarbonus wear op zak hadden en det de NS-baas op een ander eiland ver weg in de zunne lag dan de ProRail-baas? Det communiceert natuurlijk niet makkelijk zo an de rand van oe zwembad, met völle tiedverschil met mekare en met Nederland.
Denne van Knöldert