Home / archiefcentraal / denne van knoldert verzekeringswerk

denne van knoldert verzekeringswerk

“Ik ben mien tillefoon kwiet, dus vanof noe mut ie mie op een ander nummer bellen.” Het was een mail van een kammeroad. Tillefoon kwied. Had hij wear. Twee moand terugge haa’n ze ‘m ok al een fietse weg gegapt, bienoa onder zien konte vandan. Een goeje fietse nog wel, want het was een nieuwen, as vervanging vöar een eardere fietse die ze ok egapt hadden.

Op een gegeven moment goa ie d’r ok wel wat an wennen as iene altied alles kwiet is. Dus ik antwoarden zien mail met ‘Alwear wat kwiet, foei wat heb ie d’r toch ok een pech met. Verder alles nog wel een bittie in de buurte?’ Ik kreeg per omgaande antwoord, mar die mail las ik niet zo goed. Want ik was al achter de computer vandan, op weg noar de koffie in de keuken. “D’r stund iets oaver de auto”, zeg ik in de keuken teeng mien vrouw.

“Wat? Is e de auto ok al kwiet?”

“Ja, en zien vrouw ok, want die zat d’r nog in.”

“Ja, det had ik al wel zien ankommen.”

“Nou, nou, nou.”

“Foei toch. Wat sneu.”

“Heb ie ezene det ze bie de buren…”

Oonze gesprekken met de koffie wördt wat korter, noe beide wichter het huus uut bent.

Terugge bie de mail las ik det van die auto nog een kear. Het ging niet öm de auto, mar öm een auto-matisch antwoord van de mailbox wegens op vakantie weane.

Óm eam te höaren hoe het met hem ging, heb ik mien kammeroad döarumme mar eaven ebeld. Mar ik vergat det te doene noar zien neeje nummer. En toch wönn de telefoon op epakt. Ik had de baas van een restaurant in Stockhom an de lijn. De telefoon was doar achter ebleem, onder een töafeltie terugge vunn döar een ober.

Det was natuurlijk mooi nieuws, toen ik mien kammeroad doar op zien nieuwe nummer oaver opbellen. Dét nummer wönn döar zien vrouw anepakt, want mien moat was eam douchen. Ik zeg: ”Dus hij hef óe in elk geval al wear terugge ‘vunn?” Mar ik beseffen det ik doarmee het gesprek een heel verkearde kante op sturen. Uutleng leek mie zinloos, want niemand zol mie snappen. Dus nam ik het heft wear in handen met: “En ik weet ok woar de verloren tillefoon is. Gisteren toevallig uut etten ewest in Stockholm?”

“Ja, en doarnoa bent wie direct verder erene noar Noorwegen, duzend kilometer verder.”

Denne van Knöldert

Lees ook

Vaccinatielocaties geopend voor registraties in gele boekje

REGIO – Meer dan 1.500 mensen hebben vorige week in regio IJsselland alsnog een registratie …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.