Home / archiefcentraal / denne van knoldert doping

denne van knoldert doping

Ik höaren van de wekke Mona Keijzer van het CDA op de radio. Mevrouw had een völ te grote mond noar det ze zetels in de Twidde Kamer hef, en zie bedreef met die mond vöaral ok oale politiek. De VVD dit en de PvdA det, nee, het CDA, doar mossen de mensen op stemmen.

De presentator vertellen det de verkiezingen al ewest waren en det andere mensen noe probearen tenmisten echt werk te maken van het rentmeesterschap van de aarde, mar dan toch nog een vroage: of Mona in de evolutietheorie geleu’m of in het scheppingsverhaal. Doar kwam ze niet uut.

Ik herhaal: doar kwam ze niet uut. Zie vund het niet verstandig doar een antwoard op te gee’m. Noe is het van tweeën een: ie geleuft in het scheppingsverhaal en hoalt doarnoa op iedere bestuurlijk niveau oe mond; of ie geleuft in de evolutietheorie en wördt verder wear serieus enömm. Want iederiene hef recht op zien eigen mening, en ie kunt het scheppingsverhaal beeldend uutleng as een ingedikte zeu’mdaagse versie van de werkelijkheid. Mar as ie echt gelieft det God det ollemoal in zeu’m daang kloar e kreeng hef….

As God de aarde écht in zeu’m daang eschapen hef, dan mut ze die man uut de eindstand van het tovenaarsconcours halen, want dan mut d’r doping in het spel weane.

Met iemand politiek debatteren die het scheppingsverhaal as woar annemt, det lukt niet. Want iemand met zulk niveau van redeneren, die pröt zelfs een banane nog recht. Doar kun ie niet op basis van argumenten mee op weg noar het beste uutgangspunt vöar god en vaderland. Doar zal zelfs Jezus het met iens weane.

Noe hebt ze zoaterdag van het CDA een hele dag met mekare vergaderd öm te kieken woar het fout ging. Drie o’s hadden ze doar vöar bie mekare bedacht. Ondudelijkheid, Onenigheid en Onbekendheid. Ik ken mear van det soart liesten: de drie g’s, van gewin, genot en gemak. Hoalt oe doar an en ie bent zo wear een grote partieje.

Of het Ariamodel van amazing, resistance, imitation en acceptation, woarmee neeje dingen ontvangen wördt in de maatschappij. Earst verbazing, dan weerstand, vervolgens imiteren en dan accepteren. Ik ben wat het CDA en Mona Keijzer betreft, nog niet völle verder dan in complete verbazing. Want ik denk det ze de schepping ok niet geleuft, mar det wul ze niet zeggen. Precies doar lig het partijprobleem: niet zeggen wat ie denkt.

Denne van Knöldert

Lees ook

Wegmetdyslexie opent deuren in Heino

HEINO – Ron van der Horst en Corien Eijhuisen hebben op 1 juni hun eigen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.