Home / archiefcentraal / denne van knoldert jan en martin

denne van knoldert jan en martin

Jan en Martin bint twee boeren die een vrouw zuukt. Zundag zag ik de tweeling bie Yvonne zenuwachtig achter op het erf met de twintig vrouwen die zich anbeuden. Ik wul weten woar det erf is. In Oaveriessel zeg Jaspers. Mar woar in Overiessel?

Op de site van boerzoektvrouw stiet het niet. Doar hoalt ze het geheim, vermoedelijk öm ons an een grote zuuktocht te zetten. Nou, loat ik mar beginnen. An hun platte Nederlands te höaren mut ze hier uut de buurte komm. Ik zet in op Espelo (bie Holten), Nieuw Heeten (bie Roalte) of Beerze (bie Ommen). Jan en Martin proat gin Twents en hun plat is ok niet van de Zwolse kante van ‘het oosten van het land’.

An de vrouwen die een brief eschreem haa’n is het niet of te leiden. Wat ik an hun konne ziene, is det ze van goed etten hoalt. Hoewel ‘goed’… Van völle etten, doar leken ze vöaral van te hoalen. Zie waren ollemoal te dikke en sommigen waren moddervet. Vermoedelijk dachen ze det det bie kalverboeren höart. Ik denke det het Jan en Martin nog wel wat teeng veul, wat d’r op hun of kwam. Zie waren in elk geval knap stille toen de taart angesneden werd en de dames flink an het vretten sloegen. Volgens mie dach de tweeling op det moment an de persvoerkoele, woar ze het zand nog vanof mossen halen. Doar hebt ze ok een hekel an, las ik de op de KRO-site. Mar het brengt mie niet bie de woonplaatse van Jan en Martin.

Ik had dit joar ok een brief estuurd. Niet noar de homosexuele bioboer, mar noar Yvonne, det vind ik wel een lekker wiefie. Mar de KRO sturen mie een brief terugge. Yvonne deut niet met. Det heb ik wear.

Jan en Martin hebt samen een rundvee-opfokbedrijf met 70 koeien. Zie fokt kalfies op, tötdat ze oald genog bent öm drachtig emaakt te wönn. Ik vunn het metiene wear jammer det mien brief an Yvonne terugge stuurd was.

Yvonne ridt zelf de volkwagenbusse. Ik heb haar ankomst en vertrek bie de boerderieje van Jan en Martin – en hun moeder die d’r ok nog bie in woont – zes kear terugge spuult. Mar ik kon de weg niet herkennen. Ik zag zelfs gin stroatnaambörd of huusnummer. Dus ik ben d’r niet achter ekomm.

Woar woont Jan en Martin? Wie het weet mag het zeggen.

Denne van Knöldert

Lees ook

Carolien Jonkman: Ome Jan

Mijn ome Jan is overleden. Hij was mijn peetoom. Toen hij ziek werd, is aan …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.