Home / archiefcentraal / denne van knoldert curacao 3

denne van knoldert curacao 3

Det lukt mie allenig mar döar het earst fout te typen en dan de spellingcontrole an het werk te zetten. Die zeg dan vanzelf det Curacao Curaçao mut weane.

Ik had an het begin van de vakantie nog wel een probleem. Zie hebt hier het plaatsie Pannekoek. En det mag niet mear in het koninkrijk der Nederlanden. Pannekoek is pannenkoek ewönn. Trekt ze zich hier niks van an. As ie wult, stuurt ze oe noar Pannekoek, Pannenkoek kent ze niet. Mar zie maakt zich ok niet druk as ik d’r op stoa. Dan haalt ze de scholders op en loopt ze wieders.

Det doet die Curaçao-ers ok as ik ze vroage noar Wilders, wat ze doar van denkt. “Je bedoelt die partij die als een dictatuur georganiseerd is? Jullie koowmen errrr nog oewel achterrr oewat voorrr mannen dat sijn”, keken ze mie meelijwekkend an. Det de PVV het bestuur van hun eiland een roversbende nuumt, vindt ze bliekbaar vöaral zieiig vöar oons. Zelf hebt ze d’r niet zo völle last van.

Zie hebt hier sowieso nergens zo völle last van. Het lea’m is oaverzichtelijk. Nem het meest noordelijke punt van het eiland, det heet noordpunt. Heel kort doaronder lig het meest westelijke punt van het eiland: det heet westpunt. Ule hoeft niet mear dan íen kear te roane hoe het meest zudelijke punt heet…

En wat dachen jullie van het strand an de noordkante? Ja, heel goed, noordstrand. Hoe mulijk kan het weane. Ik kan mie de energie nog herinneren die de vöarlichters van Roalte neudig haa’n öm de zuidelijke woonwijk De Vloedkampen te loaten heten. En Het Raan: det is Roalte Noord. De vöarlichters hebt hun strijd op egee’m. Zie bent noe denk ik bezig met ons andere onzin te verkopen. En doar hebt ze hier op Curaçao dus hillemoal gin last van. Van Koraal Tabak töt Grote berg (det is een grote berg), nergens kom ie d’r iene teeng die zich eans druk ömme maakt.

Of toch wel, ja, ’s oams, as het donker wördt, dan bent d’r wijken in de stad woar ie better niet kunt komm, want dan bent d’r verslaafden op geldjacht vöar drugs. Mar öm die of te loaten kicken hebt ze hier het dorp Dokterstuin. En as ze doarnoa toch nog ontspoort: zie hebt hier ok een dorp Siberië. Det zal ze learen.

Denne van Knöldert

Lees ook

Sportief en Gezond peiling in Raalte

RAALTE – De gemeente Raalte, GGD IJsselland en het Sportbedrijf Raalte vragen alle inwoners van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.