Home / archiefcentraal / denne van knoldert curacao 2

denne van knoldert curacao 2

Onder leiding van de Partij vöar de vrieheid wult jullie doar in Nederland dit prachtige eiland steeds minder vrieheid gee’m. Mar wat ik hier zie? Zie lacht jullie (en mie dus ok) gewoon keihard uut, met die mooie witte tanden van hullie hier.

Balkenende riep in ien van zien 28 kabinetten op töt de mentaliteit van de West Indische Compagnie. Die club was het, die de wereldzeeën oaver voer op zuuk noar slaven. Oaveral halen de compagnie die slaven vandan. En hier op Curaçao haa’n ze d’r een soart van kennel vöar, gevangenissen woar de slaven wachten op een koper.

(In die tied dachten wie det de wereldeconomie niet kon draaien zonder slaven. Net as det wie noe nog denkt dat de wereld niet kan draaien zonder megastallen. Mar ok doar goat wie nog een kear van denken ‘wat raar, det wie zo met beesten ömmegingen’. Mar det geheel terzijde)

Hier op het strand van Curaçao zie ik de luu nog steeds zitten ofwachten. Kiek’n wat het wördt. Zie bent gin slaaf mear. Mar het bloed in de aderen kump wel van alle windstreken vandan. En de geest stiet op wantrouwen richting de slavendrievers. Ik mut earlijk zeggen det ik het nog zo gek niet vinne det die lui het d’r met zien allen een bittie van nemt.

Het wördt op een gegeven moment toch ok een bittie een volksaard. As ie töt oe verre vöarvaderen gekoeioneerd bent döar het koninkrijk woar ie nog altied onderdeel van bent, dan wördt ie doar op een gegeven moment onverschillig onder. In Nederland kun ie die onverschilligheid ok wel bespeuren. Niet vanwege het altied op de donder krieng, mar mear vanwege het feit det wie het altied goed hebt ehad. Aardgas in de bodem. Een wereldhaven. En geld op de banke wegens de slavenhandel. Döar die riekdom is de arbeidsparticipatie van vrouwen geschiedkundig lage, want de salarissen van mannen hoge zat. De wichter wördt d’r lui van, lanterfanterig. Zie bent mear van het consumeren dan van het produceren. D’r is een scheefgruui ontstoane in het geven en nemen, zal ik mar zeng.

En döarumme hebt wule zo’n beroerde sportzomer.

Denne van Knöldert

Lees ook

Schuur aan Haarweg in Lemelerveld afgebrand

LEMELERVELD – Vanmiddag heeft een grote brand gewoed in een schuur aan de Haarweg in …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.