Home / archiefcentraal / denne van knoldert aardrijkskunde

denne van knoldert aardrijkskunde

De wichter mossen op schoele learen det de continenten vrogger ollemoal teeng mekare laang, det de platen langzaam uut mekare drieft en eans aans wear teeng mekare knalt en det d’r döarömme hier en doar aardbevingen en tsunami’s kunt ontstoane.

Is heel belangrijk öm det te weten, learen mien dochter, want dan kun ie doar rekkening met hoalen. Mwa, ik kan doar wel iets bie bedenken. Mar de meesten die aardrijkskunde kriegt op de havo, komt nooit in de gelegenheid – in wulke plannenmakerij dan ok – rekkening te hoalen met schuivende continenten en vöarkomende aardbevingen. En degene die doar wél mee te maken krig, trekt zich d’r niks van an, want wrum stunn d’r in Japan dan kerncentrales op zo’n scheurlijn?

Ik had dus edacht det ze met aardrijkskunde wat in algemeenheden zollen proaten toen ik mien dochter heulp met huuswerk. En in hoofdlijnen snappen ze het perfect. Mar die gekke schoelmeister wol niet det de wichter wussen wát d’r geböaren as d’r een continent teeng een oceaan andreef, hij wol ok niet weten of het de oceaan was die onder het continent scheuf of anders ömme, hij wol zelfs niet weten wulke plaat zwoarder was, nee hij wol weten van wulk materiaal het onderste deel van de plaat van de oceaan was.

Gek is det, zulke vroang. Het is een maniere öm te kieken of de kinderen hun huuswerk goed emaakt hebt in plaatsen van det ze begriept wat ze leart. Het goede antwoard was trouwens basalt. Noe vroag ik mie of, of die arme havo-wichterties weet wat basalt is. Mar det deud d’r niet toe.

Kiek, en doar giet het fout. Want zo leart de volwassenen van de toekomst nooit woar ie wel en woar ie gin kerncentrale near mut zetten. Zo leart wie nooit det plutonium roofgoed is vöar terroristen en radioactief ofval is as het gif det in de joaren zestig-zeumtig in Lekkerkerk in de grond estopt is. Det zulke dinge gebeurt, kump ömdet wie oonze wichter verkearde dinge leart.

En doarbie: het ontnemt de kinderen lol in learen. Zie goat op cijferjacht in plaats van op kennisjacht. En döarömme ben ik groot vöarstander van diefstal van examens zodet leerlingen weet wulke antwoarden ze op al die domme vroang mut geven. Dan hoalt ze in hun vrieje tied nog wat ruumte oaver öm de dinge te learen die ze echt neudig hebt.

Dennne van Knöldert.

Lees ook

Regio Deal-project bij The Green East moet snel van start gaan

Gemeente Raalte wil meer innovatieve bedrijvigheid in agro & food-sector naar regio halen RAALTE – …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.