Home / archiefcentraal / denne van knoldert new york

denne van knoldert new york

Ik komme net terugge van een diner an de 46ste stroate, kort an de 8ste Avenue. Jawel, in Manhatten, New York. Dit Knöldertie mag doar af en toe noar toe met groepen studenten. Iemand mut het tenslotte doene.

Die studenten bent vanoamd flink an het shoppen. En umdet het ollemoal meiden bent leek het mie wies niet met te goane. Is vöar mie niet leuk. Mar vöar hen denk ik ok niet. Dus had ik het rijk vanoamd allenig.

Ok de toafel in het restaurant had ik allenig. En det vuult gek. Wel ‘ns in een restaurant ezetten det d’r eans ientie allenig an toafel zat? Ik krieg dan medelijden met zo’n man. Döar zien vrouw het huus uut estuurd? Op zakenreis in zien zielige ientie? Det soart gedachten heb ik dan oaver een aander. Wat zollen ze noe oaver mie zeggen?

’t Is een paar kear schoe’m op mien stoel as ik de grap d’r ok wel van in beginne te ziene. Zielig? Ikke? Denk wat ie wult. Ik goa zelfs wat rechter op zitten öm het stellegie det heel dicht noast mie zit (het was een vier persoons toafel, vöar mie hebt ze d’r een twee kear twee van emaakt mar het gangpad kan det niet hebben) an het twiefelen te brengen. ‘Is die man noast oons eigenlijk wel zielig?’ ‘Had ik ok eigenlijk niet liever allenig hier ezetten dan met de kreng hier teeng oaver mie?’

Op die maniere breng ik de tied döar. Bittie proaten met mie zelf. Het veul mie ok op, det ik völle mear andacht vöar het etten hadde. Met mear meansen an toafel eist het gesprek de andacht. En in mien geval ok det ik niet völle sneller het etten op hebbe dan mien toafelgenoten. De extra andacht vöar het etten kump de smaak niet ten goede. Ik had een pasta die niet kon tippen an hoe ik die thuus vöar eschötteld kriege. En in de salade zat völ te völle honing oaver de geitenkaas. Zit ik in The Big Apple, is het etten slechter dan thuus…

De bediening maken det niet bepaald goed. Zie heulen mie strak in de gaten. As ik het glas half löag hadde, schunken ze per direct bie en ik kauwde nog op mien laatste hap toen het börd al weggehaald werd.

Nee, as ie d’r nuchter teeng an kiekt, is NY ok zo biezunder nog niet.

Denne van Knöldert.

Lees ook

Foto-expositie van leerlingen Carmel en Fotoclub Salland bij Angeli Custodes

RAALTE – Burgemeester Martijn Dadema opent op woensdag 22 september om 11.00 uur een foto-expositie …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.