denne van knoldert gamma grappie

Ik was verbaasd: de gemeente zol de kommende wekken better op mien grieze container goan letten. Of ik d’r afval ik gooien det d’r niet in thuus höaren. ‘Huh?’ was mien earste reactie. En doarnoa zag ik de grap: het was een Gamma-reclamefolder die mie op het verkearde probleem wol zetten.

In de folder las ik oaver dumppriezen, alles wönn bie de bouwmarkt zo goedkoop, det de gemeente d’r bange van was det al die verbouwende mensen hun uutgesloopte tegels, tussenwandtjes, douchecellen en wat niet ollemoal mear in de grieze container zollen gooien. Althans, de brochure was zo emaakt det het leek asof de gemente mie waarschuwen, mar het was dus een Gamma-grap.

Ik zag de buuje al hangen, doar gingen klachten van komm. Niet allenig meansen die zollen goan klagen. Mar ok media die d’r wear as kwijlende hundties achteran zollen kwispelen. Want det scoort. Ik nuum det een Raymond Korse-tje, noar de journalist die d’r een handje van hef rottigheid te schöppen as d’r niks an de hand is.

En ja höar, zoaterdagmonn was het al op teletekst. Meansen haa’n massaal klachten in ediend bie hun gemeenten. Gemeenten haa’n wear lopen klagen bie de Vereniging vöar Nederlandse gemeenten. En gemeenten haa’n wear een klacht in ediend bie de Reclame Code Commissie. De media spint d’r garen bie, want zie hebt wear een rel. Mar wat dach ie van de Gamma? Tjakka, denkt doar de reclame-ofdeling, vöaral ok ömdet die codecommissie een spoedprocedure hef an ekondigd. Hoevölle reclame wul ie hemm?

Noe kan ik met disse column twee kanten op. Ie mag zelf kiezen:

1: Mooi grappie van de Gamma. Mar al die ofval die ze vöar de grap zegt lös te maken, doar wol ik nog wel een mening oaver kwiet. Wrum wördt in de pries van bouwproducten niet döarberekkend wat het kost die pröttel wear vot te krieg? Want de kosten bent natuurlijk völle hoger dan allenig de ofvoer. Al die liem, chemische verf, beton. Ik stel vöar det de Gamma oons alle onkosten al bie de anschaf löt betalen.

2: Een Gamma-grappie, banga-sletjes, hondenpoepzugers… ie hebt d’r mar zo een boel publiciteit van. Doar kan een politicus mooi gebruuk van maken. Zo kreeg ik van de wekke een tweet van wetholder De Groot. Hij had een boeiende oamd ehad bie Plaatselijk Belang Laag Zuthem. Ik twitteren terugge: ‘Vertel!’ Ik kreeg as antwoard: ‘Gewoon, boeiend.’ Zo mut het dus niet.

Denne van Knöldert.