Home / archiefcentraal / denne van knoldert fout

denne van knoldert fout

Ik reed met mien fietse van de verhoogde brugge of, wind in de rugge. Ik had de vaart d’r flink in. Van links – op een 30 km weg – kwam d’r een auto an. Mar die mos mie op de krusing vöarrang gee’m. Hij had zelfs een stopgebod.

Mar beneden an de brugge bleek de man det ollemoal niet zo in de gaten te hemm. Of zien vrouw de jappel al kloar had stoane, of e nog snel met de wichter noar oalderoamd mos, of e net op de donder ehad had van de baas, ik weet het niet. Mar menear reed minstens 70 en hij leek niet van zins te stoppen vöar mie.

Ik magge op die plekke altied graag met de haane löss fietsen. Ok op disse leenfietse kon ik mien evenwicht goed bewaren. Mar noe mos ik toch snel met de haane noar het stuur. Achteruut trappen vöar te remmen werken niet. O ja, de leenfietse had handremmen. Van links zag ik de bolide an komm stoe’m, ik beug met een bochte noar rechts öm het confrontatiemoment uut te stellen. Ik geleuve det ik ok nog wat schreeuwen. Vermoedelijk öm de andacht te trekken van de menear die zien auto feitelijk as moordwapen gebruken.

Op het leste moment zag e mie. Zíen remmen waren wél goed. Buten het verhoogde vlak de de krusing zoesen ik net vöar de auto langs.

Det leek mie wel een goed moment noar mien vöarhoofd te wiezen. Menear dreijt zien raam open en zeg: “Ie doet toch ok wel ‘ns iets fout?”

Die opmerking hef mie een tiedje bezig ehoalen. Wat een geweldige lul de behanger mut ie weane as ie det zegt, kort noadet ie d’r iene bienoa het ziekenhuus hebt in erene. Mar d’r is mear. Inderdaad, ik doe ik wel ‘ns iets fout. Wie doet ollemoal wel ‘ns een kear iets fout. Mar ie mut d’r wel van learen. As een jong konientie niet leart kort bie zien moe te bliem, is e prooi vöar een roofvogel. As een kind op schoele fouten maakt met Engels, mut ‘m det e zeg wönn vöar verbettering. En as die man mie het ziekenhuus in erene had, zol ik d’r politiewerk van maken en kreeg hij een boete.

Mar het ging net goed. Ik ben bange det disse menear niks eleard hef van mien vinger noar het vöarhoofd.

Denne van Knöldert

Lees ook

Wegmetdyslexie opent deuren in Heino

HEINO – Ron van der Horst en Corien Eijhuisen hebben op 1 juni hun eigen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.