Home / archiefcentraal / denne van knoldert droadloos

denne van knoldert droadloos

Mede dankzij de inzet van de VVD en de journalisten van de Stentor kriege wie in Salland glasvezel. D’r was völle mear dan een bittie reclame vöar neudig öm ons met zien allen zo gek te krieng te investeren in iets wat wie eigenlijk hillemoal niet neudig hebt.

Mar noe kreeg ik lest een bericht onder oong oaver archeologisch onderzuuk. Det begun bie de achterbuurman. Die hef een zandofgraving in de achtertuin. Met het zand hebt ze vrogger nog een hele woonwiek in Roalte uut de grond ehölpen. Noar noe blik, waren d’r bie die uutgraving zelfs mammoetbotten noar boa’m ekomm. Zo oald was de grond in die achtertuin.

De buurman is hillemoal gek van archeologie. Zo had hij eleazen det d’r in Amerika opgravingen edoane waren van nog vöar de geboarte van Christus. Zie vunn’ d’r köpperdroad in de grond. Noe vermoedt ze det d’r 2000 joar vöar Christus (zie wussen det zelf natuurlijk nog niet, det det 2000 joar vöar Christus was, zie preuten doar oaver de Majakalender) al communicatie mogelijk ewest was via köpperdroad. Det mut in de tied van de Indianen ewest weane. En as ik Lucky Luke d’r nog iens op noa leaze dan komt mie die köpperdroaden ok wel bekend vöar. Het mut de telegraafpoalen ewest weane die de gebroeders Dalton iedere kear onderuut haalden, die ze doar in de grond antröffen. Feitelijk waren de Daltons al köpperdieven.

Dus wat wie teengwoardig doet met internet en köpper, det is eigenlijk niet zo nieuw.

Mar d’r was nog mear onderzuuk edoane, halen de buurman met een ander krantenknipsel boam toafel. In de Siberische koale van Rusland schient zelfs glasvezel ontdekt te weane. 3000 Joar elene. Ik wol doar eigenlijk niet an. Ik had het gevuul det de buurman mie bie de biene had. Mar hij heult vol. Bie hoog en lage. En hij had ok wel goeje argumenten. Rusland was al heel vrog een land van glasbloazers. En in de koale van Siberië was glasvezel ok völle veiliger dan köpper.

Dus wat wie straks dankzij de reclamecampagne van VVD en de Stentor doet met internet en glasvezel, det is eigenlijk niet zo nieuw.

Terugge noar de vijver van de buurman. As hij doar mammoetbotten vund, dan wol ik wel weten of hij nog iets as köpper of glasvezel evunn’ had. “Nee”, zeg e, in die tied was de communicatie hier in de streek al droadloos.

Denne van Knöldert

Lees ook

Vriendenkring van de Hartkamp viert 40-jarig bestaan

‘Het doel is exact hetzelfde gebleven: ‘Het leven voor de bewoners zo aangenaam mogelijk maken’ …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.