Ik heb de wearkaarte vöar de kommende dagen en wekken goed bestudeard, en ik kan ule verklappen: de elfstedentocht giet döar. Vriedag kump net te vrog. Mooiste datum is zoaterdag of zundag. Mar ömdat Nederland dan vrie is en d’r dan dus te völle volk noar Friesland kump, gokt de rayonhoofden op moandag. Det lik kantje board, mar het giet goed.
Dus nem vaste vrie vollende wekke moandag, as ie d’r bie wult weane.
Ik was d’r al een kear bie, bie de elfstedentocht. Niet bie de schaatstocht trouwens, mar bie de elfstedentocht van Youp van ’t Hek. Youp gaf op ien dag in alle elf steden een optreden. En in alle theaters was d’r vöar en noa zien bezuuk een rest-vöarstelling. Ik zag Adelheid Roosen en Karin Bloemen in een töt theater ömgebouwde woonkamer an de gracht die zundagoamd met het Journaal in beeld was. De presentator was uut Hilversum al hillemoal noar het noorden ofereisd.
En fietsend heb ik ‘m ok een kear edoane. Van Bartlehiem noar Dokkum teeng de storm in. Terug noar Bartlehiem rechtop met de jasse wied open as een zeil van een boot. Wie waren d’r zo.
Vollende wekke wear noar Friesland. Det giet een koale dag wönn. Mar doar kleed ik mie wel op. Een bivakmutse mag niet. Mar as ik det combinear met een Unox knakworst en een glas bier, dan zut de poltiie gelieke det ik gin moslim benne, dus dan ziet ze det wel döar de vingers.
Ik heb mie al een kamer eboekt in Bartlehiem. Det ging nog wel makkelijk. Want gin hond die mie geleuft det het vollende wekke moandag giet geböaren. Ik kan zundag ofreizen noar het noarden en breng dan de nacht döar in de opkamer van de familie Sipkema. Ik bellen ‘m op vöar de reservering.
Hij zeg ‘geet het on dan?’
Ik zeg: ‘niet verder vertellen, mar moandag is het zo wied.”
Hij zeg: “Det ken neit.”
Ik zeg: “Ik dach ik dus ok. Dus doe mie die kamer mar.”
Het is een tweepersoonskamer met ien groot bedde. En vöarlopig heb ik nog gin medereiziger. Zinne öm mee te goane? Loat het mie weten. De teengprestatie hoef nie zo groot te weane. Mie ’s nachts lekker warm hoalen, is wel het belangrijkste. En o ja, in de kamer geldt een boerkaverbod.
Denne van Knöldert