1 Maart: Nationale Complimentendag. Ik wul van de gelegenheid gebruuk maken de NS te complimenteren. In herfst en winter konn’ ze mie niet hillemoal van A noar B krieng, mar ik begriep det noe: zie hebt zo’n hoge veiligheid op hun producten, det ze doar alle organisatietied en -talent mee kwiet bent.
En doarbie: Einstein zei al: “kennis brengt ons van A naar B, verbeelding brengt ons naar overal.”
Ik reis woon-werk met de trein. De baas betaalt een deel. Döarömme mos ik vöarig joar een OV-chipkaart en het kump noe op declarearen an. Ik denk: eam noar mien privédeel op ns.nl, mar det ging zo mar niet. Net as het kopen en het activeren van de OV-chipkaart mos ik een heleboel veiligheidsstappen maken.
Zo zei de NS ten eerste det ze het makkelijker e’maakt haa’n in te loggen. Mien oale inlog was al verwijderd en de nieuwe inlog die ik activearen, werken pas noadet ze mie een brief met geheime code opsturen. Doarnoa mos ik mien OV-kaarte koppelen an het privé-account. Doarvöar mos ik email en codewoord invoeren. Mar de NS had ok hier mien email weg’egooid. Gin probleem, tien minuten later had ik een nieuw wachtwoard via de mail.
Ik dache noe eindelijk an het declarearen te kunnen. Mar nee, ik had ok nog wear een extra code neudig woarmee mien OV-chipkaarte geactiveard mos wönn. Det kon bie ‘een OV-chipkaartautomaat of bie een van de overige oplaadpunten voor de OV-chipkaart’. Gin idee woar ik die dingen kanne vinden. Ik zie bie het station pöalties, mar kwam lest bie de C1000 ok iets van de NS teeng. Onlogisch? Nee, het ollemoal veiligheid.
Ik heb de handleiding mar eam uut eprint vöar as ik straks op het station benne. “Hou de OV-chipkaart voor de kaartlezer rechts onder het scherm”. En “Kies ‘ophalen bestellingen’. Volg verder de aanwijzigen op het scherm.”
Heel verstandig, die wazige taal. As Snuf en Snuitje mien code (tMwT8W) an de weet komt is Nederland in last. En Snuf giet vaste onder het scherm zuken in plaats van rechts onder óp het scherm.
De NS stelt echt alles in het werk het mie bienoa onmogelijk te maken met de OV-chipkaart te reizen want de privacygrens is superhoge. Ik begriep wel det d’r in herfst en winter gin tied oaver is vöar treinen op tied te loaten riene.
Mien complimenten.
Denne van Knöldert