Home / archiefcentraal / denne van knoldert helm

denne van knoldert helm

Wule mut met schaatsen een helm op doene. Det vindt een arts die op de Earste Hulp in het ziekehuus werkt en disse vorsttied het ien en ander an hersenletsel binnen kreeg. Ben ik vöar of teeng? Ik weet het niet zo goed.

Op de racefietse draag ik ok gin helm. In de auto draag ik allenig een gordel as d’r politie in de buurte kan weane. In mien gedrag liek ik dus teeng. Mar ik kenne mien gedrag as gin ander. Ik denke det d’r ok een stukkie eingwiezigheid bie kump kieken. Een gezond stukkie eingwieigheid. As het mut, ben ik teeng.

Mar ik ben ok wel teeng die bemuuials die zegt det helm en gordel verplicht bent. Die eist det ik niet belle van achter het stuur. En die beweart det het heel erg gevoarljk is as ie met de fietse döar rood riedt as d’r nergens verkear vandan kump. Ik ben niet zo van het kamp van ‘nou, det bent noe ien kear de regels.’ Gelul.

Ik zol de discussie nog wel wullen voeren oaver ‘verstandig’. Ja, ik denk wel, det het iets verstandiger is een helm te draang met schaatsen. En ik denk ok det het iets verstandiger is een helm te draang met wielrennen. Mar ik denk ok det het verstandig is gin cola te drinken en wat minder bier. Ik denk ok det het niet verstandig is al die E-nummers noar binnen te werken die de moordlustige voedingsmiddelenindustrie ollemoal in ons etten stopt.

Ik denk det d’r mear mensen onverstandig bent döar niet te fietsen, dan det d’r mensen onverstandig bent döar te fietsen zonder helm. Det raakt de discussie oaver sportblessures. Alles met elkare is niet sporten (sportief beweang) altied nog völle ongezonder als sporten met alle blessures die d’r bie höart.

Ik zat van de zommer op een terras lekker van mien koffie verkeard te genieten. Het was halverwege een monsterfietstocht van Rotterdam noar Roalte. Vroeg een andere terrasgast woar ik mien helm hadde. ‘Thuus’, antwoarden ik, want ik heb d’r wel iene, maar ik draag hem nooit. ‘Foei toch, foei toch, foei toch’ was zien reactie, en ‘wie betaalt de kosten as ie straks in het ziekenhuus belandt?’ ‘Det is wel een interessante gedachte’, gaf ik toe, ‘mut iemand zien eigen ziektekosten betalen as e gezondheidsrisico’s nemt.’ Tevreden oaver zien geliek stak de man een sigarette op.

Denne van Knöldert.

Lees ook

Collecties historische publicaties deels samengevoegd

Rijnbrink, Athenaeumbibliotheek en Historisch Centrum Overijssel ondertekenen convenant REGIO – Als geïnteresseerde in historische publicaties …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.