Toen het er nog op leek det de elfstedentocht döar zol goane, zat d’r bie De Wereld Draait Door een Fries die het oaver het kwaken van de eenden had. As ze stille waren, zat d’r nog vorst an te komm. Was hij de dorpsgek of mossen wule hem serieus nemm’.
In het westerse Hilversum lachen ze d’r ömme. Mar vanof het platteland vuul ik hillemoal met de man mee. Ik kan d’r nog gin betekenis an gee’m mar as ik ’s mons vrog de neuse buten de döare stekke, vuul ik ok as d’r verandering op tilt is. Det is een bienoa gelukzalig gevuul.
Bie mie begint de mollen ok soms iniens actief te wönn en ik vroag mie dan of wrum de iene kear wel en de aandere kear niet. Ik zie vogels in v-vorm soms noar en soms van het zuden vlieng. Soms rent de kippen as een gek noar een dak boa’m het heufd “ömdat ze an de schaduw kunt ziene det een roofvogel in de lucht hangt”, kreeg ik as uutleg, mar zie doet het ok op een bewolkte dag.
Het blif verrassend. Ik stund lest op een stukkie nat gröss en as ik goed lusteren kon ik het water in de grond höaren zakken. Echt woar! Vöarige wekke leup ik noar buten, de dooi was in’etreden, ik kon iniens het grös roeken. Een soart lucht die het midden had tussen heuj en persvoer. En ik merken an de drukte in mien heufd de oavergang van maagdelijk witte velden noar oneffen gekleurde vergezichten.
De buurman had het al an’ekondigd die dooi. Völle earder nog dan det de wearmannen op tv d’r an toe waren. Die wearmannen liekt mie last te hemm’ van subjectief gedrag. Die maakt van het wear een spannend verhaal. Goed vöar de kijkcijfers, slecht vöar de werkelijkheid. De buurman hef doar gin last van. Die stak de neuze buten de döare en vulen het gelieke al: “de wind stiet iets oostelijker. Het giet koald wönn vannacht. Mar vandage waren de ganzen ok onrustig. Dus hoe lange of die vorst nog anhölt…
Op zien advies heb ik de mollenklemmen ok mar wear op scherp ezet in de hoofdgang van de familie Monfert. En ’s nachts doede wie het kippenhok better op slot dan anders. Want die dooi schient vöar vossen reden te weane op strooptocht te goane.
Loat ze in Holland mar lachen öm oons. Zie weet niet wat ze mist.
Denne van Knöldert.