Ik wörd steeds een bittie kregeligger van de maniere woarop de wereld rond dreijt. Eb en vloed, zunne en moane, det dut het ollemoal nog wel, want doar is de wereld zelf verantwoardelijk vöar. Zo gauw wie as mens ons d’r met bemuuit…. Soms in het groot, soms in het klein, mar het giet fout. En ik snappe nie det wie d’r niet met zien allen teeng in het gewear komt.
In mien ientie doe ik mien beste d’r nog wel op. Zo was ik altied tevreane klante bie de Rabobanke. Mar toen ze mie begunn uut te neudigen vöar een golf-clinic, had ik döar det ik een kostbare melkkoe was die ze graag in de wei hebt. Toen ze ok nog geld gingen vroang vöar allerlei verplichte diensten die ik niet neudig hebbe, heb ik besloten mien geld onder te brengen bie een earlijker banke.
En noe is het de ANWB. Ik ben teeng de ANWB ömdet ze d’r doar iene hebt zitten die op politiek Den Haag-niveau met pröt namens alle leden, mar ik wol liever det die man zien kop hölt. Want ik ben ok lid en ik denk det de ANWB rabiate onzin vertelt. Ik ben vöar rekkening riene. Héél vöar. Mar dan zeg de ANWB namens zien leden – dus ok namens mie – det ze teeng bent.
Mar ja, ik wulle wel iens sportachtige kleare kopen bie de ANWB en gratis routekaarten hemm vöar vakantie. Det lukt niet mear op een andermans ANWB-lidmaatschap ömdet ze mie doar kent. Van een lidmaatschap kump een VISA-kaarte en van een VISA-kaarte kump een site met vöardelen en geldbehear.
Dus ik loggen mie van de wekke netties in op die site. Wat dan opvalt is det ik earst al mien persoonlijke gegevens in mut vullen. Wat ze d’r met wult weet ik niet, mar ik zag gin vakkie woar ze mie vroegen wat ik van rekkening riene vunne…
Afijn, alles ingevuld hebbende – inclusief de unieke code die dan wear per brief noar mie toe estuurd was – druk ik op enter en toen zei de computer det det dus mooi niet döar ging. Ik had een verkeard kaartnummer in evoerd. Toen ik det netties gecorrigeed hadde ging het weer van ‘enter’ en toen zei e det ik al drie kear iets verkeards edoane hadde en det ik noe mar met de ANWB mosse bellen.
Zie kunt een dikken krieng bie de ANWB.
Denne van Knöldert