Wie meung met 130 kilometer per uur het neeje joar in. Niet harder, want verkearsboetes wördt duurder. Het bent twee idiote maatregelen van het oflopende joar. Leve de politiek, hoera, hoera, hoera. Het beroep politicus det ooit een eerbiedwaardige functie was, keldert op de ranglijst van populariteit. Hoeren doet het nog net slechter. Öm de bankdirecteuren boam zich te hoalen, bedachten politici ok snel nog eam de weigerambtenaar.
Weigerambtenaren, verkearsboetes en met 130 kilometer döar de bochte. Hearlijk.
De VVD is vöar weigerambtenaren die homo’s niet wult trouwen, want zo hebt ze estemt. Mar zie bent ok teeng. Ja, politici kunt eans teeng weane en toch vöar stemmen. ‘Verloochenen’ nuumt Jezus det en dan goat d’r altied hanen kraaien. Doarvöar hebt wule ze eköazen. Öm namens ons een bittie de lulhannes uut te hang. Liberaal Nederland zut zien volksvertegenwoordigers heulen met de SGP. Die bent teeng homo’s en noe hebt ze de VVD in de konte zitten te kroepen. En het is druk in die konte. Op provinciaal niveau zit het CDA d’r ok bie in. Die zit doar öm links Nederland buten de döare te hoalen.
De verkearsboetes bent ok de lucht in egoane. Noe de politie niet mear bekeurt öm winst te maken – wat ze joaren edoane hebt – kump d’r völle minder geld in de schatkiste en dus goat de boetes ömhoge. Zo hoge, det de politie ze niet mear uut wul of durft te kearen. Idee is noe, det de politie zelf mag bepalen of ze de hele boete, of een deel d’r van goat uutdelen. Vöar de zekerheid heb ik al vaste wat ömkoopgeld vöar in het dashboardkassie ling, mar wieders ben ik teeng. De politie is de uutvoerende macht. Politici maakt de wetgeving. Want det kunt ze zo goed…
Nem de 130 kilometer per uur. “Nee, hillemoal gin symboolpolitiek”,röp bedenker Abtroot, en hij denkt ok nog det wule hem geleuft. Met die hogere snelheid en miljoenen an veiligheidsmaatregelen valt d’r gin extra doden. “Dus is het niet gevoarlijker”, zeg Abtroot. Had de VVD niet wat slimmer volk noar Den Haag kunn’ sturen? Want zonder die extra maatregelen valt d’r dus wél mear doden. En met die maatregelen, mar zonder hogere snelheid, valt d’r vermoedelijk minder doden.
Det hef het volk ok ollemoal wel döar, mar wie meung mooi wel 130. Det is het ienige woar het oons öm giet. Zeg det dan ok gewoon.
Ollemoal een goed 2012.
Denne van Knöldert