Angola is een tropisch land. De olifant leaft d’r in het wild. Zie hebt een tien partijenstelsel. En d’r zit een schat an mineralen, öllie en aardgas in de grond. Dus woar zöart die Mauro noe nog hillemoal oaver? Met zien kennis van het Engels en het benutten van een studiekans zal hij in het armoedige land – det wel – vaste snel uutgruuien töt een vooraanstaand Angolees, een persoon die rijkdom en welvaart veroorzaakt, een redder van de republiek.
Ik snap niet zo goed det het CDA die kante van het verhaal niet wat mear uut’enut hef. Zie haa’n d’r mooi positief uut kunn komm. In Nederland de held weane döar een Angelolees én het land uut te zetten én een prachtig leam in het vöaruutzicht te stellen. En in Angola een tevreden Mauro nearzetten die, bekeard töt het christendom, de 600 joar geleden döar de Portugezen ingeslagen weg zo verder kon bewandelen: christenen maken van al die lieve kleine zwarte mensies.
53 Procent van de mensen in Angola is het christendom op’edrung. Letterlijk half werk van die Portugezen die vrogger saams met Nederland de wereldzeeën oavertrökken op zuuk noar te bekearen volkeren. Half werk, het leidden töt burgeroarlogen met de andere, niet bekearde helfte van het and. En doar kwamen armoede en vluchtelingen van. Mauro is van beiden een bittie. Zien moe zetten hem van wanhoop op het vliegtuug noar de veroorzakers.
Wie kan d’r zo jong al zeng det e twee moederlanden hef? Ja, Douglas van FC Twente misschien. Die krig binnenkort zelfs een Nederlands paspoart, mar doar ligt de belangen anders. Want het Nederlands elftal hef een slechte verdediging.
“Mauro hef gin recht op een regulier visum volgens de reguliere regels”, zei minister Leers, de lieve Limburger die as burgemeester op mos stappen wegens machtsmisbruuk. Reguliere regels, toen ik det höaren mos ik terugge denken an de begintied van zien christelijke geleuf.
Farizeeën waren de regelbewakers van de tied woarin Jezus lea’m. Zie hielden zich strikt an de wet zoas die in de bijbel stund. Zie zollen vast en zeker in de hemel komm döar vroom te leam, precies volgens de letter van de wet.
Leers is feitelijk een Farizeeër van disse tied. Mar hij hef de bijbel niet goed genog eleazen. Want dan had hij ok eweten wat zien grote vöarbeeld Jezus deud met die lui: hij hef ze de tempel uut ejaagd.
Denne van Knöldert