Home / archiefcentraal / denne van knoldert taaimlaain

denne van knoldert taaimlaain

D’r mut eigenlijk timeline boam dit artikel stoane, mar niet iederiene beheerst het engels, döarumme stiet d’r taaimlaain. Het is de maniere woarop Veejsboek alias Facebook oe en mie in de gaten höalt.

Ik schreve vöarige wekke oaver een gekochte film bie Bol.com en det ie noa de bestelling in iene muuite döar, oe ankoop döar kunt twitteren noar al oe followers, alias volgers. Mar het is nog völle gekker. Völle erger.

Ik leg het eam uut an wat oaldere meansen, zodet die kunt leazen hoe dom wule bezig bent: As ie iets op internet zuukt, wördt det onthoalen döar computers. Google slöt al die informatie op. Zo weet ze bie Google earder det d’r een griepepidemie ankump, dan det de dokter det weet. Want as wule met zien allen op middelties teeng verkoaldheid zuukt, hef de dokter nog niks döar, mar Google zut de griep al ankomm.

Een onschuldig vöarbeeld.

Mar Google leg álles vaste. Zie weet döarumme precies wie ie bent, wat ie denkt, woar ie koopt, wat oe agenda is… Gewoon oe emails koppelen an oe zuukgedrag en hoppa.

Met Facebook en Twitter wördt het ollemoal nog gekker. Alles wat ie doar op achter loat, blif töt in lengte van joaren bekend. Zo mog ik lest meebeslissen oaver neej personeel en ientie bleek mee edoane te hemm in de interessante twitterdiscussie ‘Ik goa sloapen’, ‘Sloap ie al?’, ‘Ik antwoard niet mear want ik sloap al’. Ik zeg: loate wie die mar niet nemm, want die hef gin tied van werken.

Facebook giet verder. Op twee fronten. Earstens bliekt ze al oe berichten bewaard te hemm die ie ooit d’r op ezet hebt en met de introductie van timeline kunt al oe vrienden zunder muuite nog eam in oe leam van tien joar terugge kieken. Dus det ie as 26-joarige carrièremaker geconfronteard wördt met wat ie deut en dach toen ie 16 was.

En ten tweede kriegt al oe vrienden per direct bericht, as ie iets zuukt op internet. Dus as ik een mooi artikel in de Volkskraante via internet leaze kunt al mien vrienden det gelieke ziene. Mien baas ok.

Ie kunt det meegluren uutzetten, de’s niet makkelijk, mar het kan. Mar ik wol het graag andersömme ziene. Det ik het an konne zetten as ik interesse hadde. Mar det dut Facebook niet. Want oe en mien gegevens bent handel vöar agressieve verkopers.

Denne van Knöldert

Lees ook

Lefulux Wonen opent met grootste aanbod meubelen en interieurobjecten van versteend hout

(Advertorial) Aantrekkelijke korting tijdens openingsdagen op 2, 3 en 4 oktober HEETEN – De unieke …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.