Home / archiefcentraal / denne van knoldert porno

denne van knoldert porno

Sinds die Diederik Stapel bekend hef det onderzukers gegevens bedenkt in plaatsen van det ze d’r honderd of duzend enquêtes vöar ofnemt, durf ik dan eindelijk met dit verhaal te komm.

Onderzuuk hef namelijk uut ewezen det honderd procent van de mannen porno kik. Ontkennen hef dan gin zin. Hád gin zin, want ik durf noe het onderzoek te diskwalificearen.

Heikel onderwerp, porno kieken. Niet oaver hemm, vuult allenig mar ongemakkelijk. Seks in het algemeen is vöar meansen van mien generatie ok gin makkelijk onderwerp. Zo makkelijk as de jeugd doar oaver pröt… Brommers kieken, iemand onder de snorre bloazen, stroekie doeken, zie bunt d’r mar druk met. Mar ik kwam d’r lest achter det het jonge volk ok wel grenzen hef. Toen de verhalen an de dinertoafel mie wat te intiem wönn, heb ik vöar de verandering ‘ns een kear niet evroagd of het oaver een ander onderwerp mog goane, mar ik heb vöar esteld det ik wat van mien meest recente ervaringen zol inbrengen. Noa, toen was het gauw of elopen.

Ik koche mie lest een film bie Bol.com. Nee, gin seksfilm, mar een keurige film oaver een journalist die leugenachtig döar het leam giet. Ik kenne wel wat van det volk dus met ‘Shatterd glasses’ wol ik mie in zo’n zieke geest verdiepen. Öm de digitale bestelling of te ronden, mos ik töt slot een kear of drie ‘oke’ drukken.

Oke, oke, oke en, hé, wat is det, nog een kear oke? Ik had de doem al bienoa op de spatiebalk loaten vallen, toen ik zagge det mie evroagd werd of ik mien nieuwste ankoop wol twitteren. Net gin ‘oke’, dus mut mien volgers híer leazen wukke film ik recent ekeken hebbe, in plaatsen det ze het in de wirwar van nutteloze andere tweets teeng zollen komm.

Op mien werk hebt ze het völle oaver nut en noodzaak van de social media. Het giet d’r dan niet ömme wat wie d’r privé zelf ollemoal opzet, mar hoe ie al die tweets van aanderen an kunt wenden vöar een verhoogde omzet. Die bol.com-actie vind ik doar wel een mooi vöarbeeld van. As twitterzieke mensen bereid bent an al hun volgers te zeng wat ze net ekocht hebt, kan det de ömzet van meneer Bol flink verhogen.

Woarop een collega van mie zei: “ Ie zult mar net een pornofilm besteld hemm.”

Het blif oppassen.

Denne van Knöldert

Lees ook

Sportief en Gezond peiling in Raalte

RAALTE – De gemeente Raalte, GGD IJsselland en het Sportbedrijf Raalte vragen alle inwoners van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.