Home / archiefcentraal / denne van knoldert rekken

denne van knoldert rekken

“Nee, het is echt niet neudig”, zei de deskundige op de radio. Hij had het oaver rekken en strekken vöar de sport. Ik had het altied al edacht. Det gekke gedoe van een boom probearen ömme te drukken kort vöar het hardlopen, neans goed vöar.

Wie weet ollemoal hoe det soart dinge werkt. Iene bedenkt det rekken en strekken goed is. Hij krig anhangers die de gedachte klakkeloos oavernemt en die vervolgens met de kennis an de haal goat. Zie ontwikkelt het verder in plaatsen van terugge te goan noar de basis: woar kump het idee vandan en klopt det wel. Het is Jezus ok oaverkomm. Hij was wat helderziend en aanderen bent d’r vervolgens met an de haal egoane. De regelgeving in de ambtenarij hef d’r ok last van. Bie nieuwe inzichten goat ze niet terugge noar de basis, mar knupt steeds een neeje regel boamop de oalen. Net zo lange det het ollemoal te onoaverzichtelijk wördt vöar begrip. Dan kump zelfs oonze minister president weg met een ‘sorry’ as e oons 50-miljard vöarlög oaver de steun an het failliete Griekenland. Hoe kan die man det ollemoal nog begriepen?

De deskundige: “Rekken en strekken is öm de spieren op te warmen. Det bereik ie better met rustig wat huppelen in het begin. En as ie wat warm wördt, huppel ie wat fanatieker. Mooi zat”, zei de deskundige.

Ik vulen mie as in een oflevering van Bananasplit. Heb ik al die joaren dus vöar Jan met de korte achtername een spagaat probeard? Zol die socioloog Diederik Stapel data verzunnen hemm öm het rekken tot belangriek vöarspel van de sport te maken? Ok in de wetenschap is niks mear zeker.

De deskundige: “Vöaral det oaverdreem oprekken van de spieren in de lies en in de achillespees, bent earder gevoarlijk dan det ie d’r baat bie hebt. Want te lang opgerekte spieren maakt oe oaver-mobiel. De kans det ie te verre döarschiet in de beweging is leamsgroot.”

Ik hebbe d’r learing uut e trökken. Ik goa op de fietse noar de volleybal. Dan heb ik al een lekkere basiswarmte te pakken. Ien kear op het veld hoal ik voetballend een ballegie hoge. Met mien techniek is det ok redelijk vermuuiend. En doarnoa schiet mien moat en ik volleyballen zo hard mogelijk dwars döar de zaal. Maakt de benen lekker warm. Is ok goed vöar de lachspieren, En in het ontwieken van die kanonskogels is det metiene ok een goeie warming up vöar de teamgenoten.

Denne van Knöldert

Lees ook

Carolien Jonkman: Luisteren

Steeds meer mensen luisteren naar zichzelf en zijn zich bewust van wat er in hun …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.